ShAShMAQOM OLIMLAR NIGOHIDA

466


Ko'p asrlik madaniyatimiz, xususan, milliy musiqamizda maqomning o'rni beqiyos. Ushbu ulkan merosni ilmiy asosda chuqur o'rganish, targ'ib qilish, yosh avlodni shu san`atga oshno etish ma`naviy hayotimizning ajralmas bo'lagi sanaladi. Davlatimiz rahbarining 2017 yil 17 noyabrda kuchga kirgan “O'zbek milliy maqom san`atini yanada rivojlantirish chora-tadbirlari to'g'risida”gi qarori bu boradagi sa`y-harakatlarda dasturilamal vazifasini o'tamoqda. Buxoro davlat universitetida bo'lib o'tgan “Buxoro shashmaqomi: tarixiy-nazariy va amaliy masalalar” mavzusidagi respublika ilmiy-amaliy anjumani shu haqda bo'ldi.

O'zbekiston kompozitorlari va bastakorlari uyushmasi tomonidan uyushtirilgan mazkur tadbirda yurtimizdagi bir qancha oliy o'quv yurtlarining professor-o'qituvchilari, musiqashunoslar, soha mutaxassislari, yosh maqomchilar, talabalar qatnashdi.

Anjumanda milliy musiqamizning ko'zga ko'ringan tadqiqotchilari o'z ma`ruzalari orqali Buxoro shashmaqomining ko'pchilikka noma`lum qirralari xususida o'rtoqlashdilar. O'zbekistonda xizmat ko'rsatgan san`at arbobi, professor Otanazar Matyakubov ko'hna san`atimizning ushbu boy xazinasi tarixi, Najmiddin Kavkabiy, Darvesh Ali Changiy, Abdurauf Fitrat kabi olimlarning bu boradagi ilmiy izlanishlariga to'xtaldi. O'z navbatida, farg'onalik musiqashunos, O'zbekiston davlat konservatoriyasi professori, san`atshunoslik fanlari doktori To'xtasin G'afurbekov buyuk bastakor Mutal Burxonov o'z ijodida shashmaqom ohanglaridan qay darajada foydalanganiga e`tiborni qaratdi.

Shuningdek, Urganch davlat universiteti o'qituvchilari Botir Rahimov va Rustam Boltaev o'z chiqishlarida Buxoro shashmaqomi hamda Xorazm olti yarim maqomini qiyosiy tahlil etishdi.

Rustam IBRAGIMOV,

Ishonch” muxbiri

Boshqa xabarlar