AYoLLARGA GAP YO'Q

177


Samarqand shahridagi Sport o'yin turlari va yengil atletika ixtisoslashtirilgan bolalar o'smirlar sport maktabi hamda Siyob tibbiyot kolleji sport majmualarida  “A`nanaviy viloyat ayollar spartakiadasi” bo'lib o'tdi. Unda turli sohada mehnat qilayotgan 224 nafar xotin-qiz sportning yetti turi bo'yicha o'z mahoratlarini namoyish etishdi.

Spartakiadaning tantanali ochilish marosimida Samarqand viloyati kasaba uyushma tashkilotlari birlashmasi kengashi raisi Suhrob Rafiqov va viloyat hokimi o'rinbosari, viloyat xotin-qizlar qo'mitasi raisi Gavhar Alimova sog'lom hayot tarzi asosi bo'lmish sportning, kundalik, oilaviy hayotdagi o'rni xususida so'z yuritdilar.

Qur`adan so'ng, hududlardan tashrif buyurgan jamoalar qizg'in bahsga kirishdilar. Siyob tibbiyot kolleji sport majmuasida valeybol bo'yicha bo'lib o'tgan bellashuvlar keskin va murosasiz kechdi. Bahslar mobaynida xotin-qizlar bo'sh vaqtlarini sportga bag'ishlayotganliklari yaqqol sezilib turdi. Raqiblarni birma-bir taslim qilgan Payariq tuman 88-maktab valeybolchilari musobaqaning eng yuqori pag'onasini zabt etdi.

Stritbol musobaqasida Kattaqo'rg'on shahridagi 8-12-maktablar jamoalari barchadan ustun kelishdi. Shaxmatda Toyloq tumanidagi 34-maktab o'qituvchisi Farida Xursanova barcha raqiblarini dog'da qoldirdi. Shashka bo'yicha eng yuqori marrani Bulung'ur tumanidagi 54-maktab o'qituvchisi Gulasal Musaeva egalladi. Darts turi bo'yicha eng ko'p ochko jamg'argan Narpay tuman BO'SM xodimi Muhabbat Xudoyberdieva g'olib bo'ldi. Yana bir narpaylik, 2-maktab o'qituvchisi Mavjuda Xalilova uzunlikka sakrashda mutlaq g'olibga aylandi.

– Bizning tumanimizda sportning ommaviyligiga bo'lgan e`tibor yildan yilga yaxshilanib bormoqda, – deydi payariqlik o'qituvchi Guli Aminova. – Hozirgi kunda nafaqat mehnat jamoalari yoxud maktab, balki mahallalarda ham sportning bir qator turlari bilan shug'ullanuvchilar ko'paydi. Aksariyat qishloqlarda yashovchi uy bekalari ham ertalabki yugurish mashqlarida ishtirok etmoqda. Kasaba uyushmalari tomonidan tashkil etilgan musobaqada tumanimiz vakillari munosib ishtirok etishgani buning yaqqol tasdig'idir.

Ayollar spartakiadasining eng faol ishtirokchilari ta`lim tizimida mehnat qilayotgan ayollar ekanligini e`tirof etish darkor. Barcha sovrinli o'rinlarning ular tomonidan egallanganligi ham sohada sportga bo'lgan e`tibordan dalolat. Bu barcha tizimlarga ibrat bo'lishi kerak, deb o'ylaymiz.

G'olib va peshqadamlar kasaba uyushmalari tomonidan taqdirlandi.

Nurilla ShAMSIEV,

                                                 “Ishonch” muxbiri       

Boshqa xabarlar