PORLOQ KELAJAK UChUN IShLASh

51


Samarqand shahridagi Yoshlar markazida “Tez o'zgaruvchan mehnat sohasi: muammo va yechimlar”  mavzusidagi milliy konferensiya bo'lib o'tmoqda.

Xalqaro mehnat tashkiloti tashkil topganligining yuz yilligi oldidan o'tkazilayotgan anjumanda mazkur tashkilotning Mehnat sohasi istiqboli masalalari bo'yicha global komissiyasining “Porloq kelajak uchun ishlash” nomli ma`ruzasi muhokama etilishi ko'zda tutilgan. Unda Xalqaro mehnat tashkiloti vakillari, vazirlik, idoralar, ish beruvchi tashkilotlar va kasaba uyushmalari vakillari ishtirok etmoqda.

Konferensiyani O'zbekiston kasaba uyushmalari Federasiyasi kengashi raisi o'rinbosari Baxtiyor Mahmadaliev ochib, mamlakatimizda mehnat munosabatlaridagi tub o'zgarishlar, munosib mehnat sharoiti yaratilishi, majburiy mehnatga qarshi amalga oshirilgan ishlarga to'xtalib o'tdi.

Shundan so'ng, XMTning mehnatkashlar faoliyati bo'yicha byurosi (AKTRAV) direktori o'rinbosari Anna Biondi, XMTning mehnatkashlar faoliyati bo'yicha byurosi (AKTRAV)ning Yevropa va Markaziy Osiyo sektori mudiri Sergeyus Glovaskas, ushbu tashkilotning Sharqiy Yevropa va Markaziy Osiyo mamlakatlari Byurosining mehnatkashlar faoliyati bo'yicha mutaxassisi Gocha Aleksandriya, XMTning “O'zbekistonda munosib mehnat bo'yicha mamlakat dasturi amalga oshirilishiga ko'maklashish” loyihasi katta texnik maslahatchisi Anton Xauzenlar mehnat sohasi istiqboli bo'yicha global komissiyasining ma`ruzasida istiqbolga ta`sir ko'rsatuvchi omillar, istiqbolli g'oyalarni ilgari surish va amalga oshirishda mintaqaviy faoliyat, O'zbekistonda munosib mehnat dasturi doirasida amalga oshirilgan ishlar xususida so'z yuritishdi.

    Ayni paytda mehnat sohasini rivojlantirishda ustuvor vazifalar, ijtimoiy sherikchilikka asoslangan kelishuvlar va bitimlar ijrosi, xalqaro hamkorlik doirasida ishlab chiqilgan “Yo'l xaritasi”ning asosiy jihatlari va  shunga o'xshash bir qator dolzarb masalalar muhokama etilmoqda.

Nurilla ShAMSIEV,

“Ishonch” muxbiri

Boshqa xabarlar