DAVOLAGANDAN KO'RA…

27


Yunusobod tumanidagi 54-oilaviy poliklinika shifokorlari hududdagi bir qator mahallalar aholisi o'rtasida tibbiy ko'rik uyushtirildi.

“Qumqo'rg'on” mahallasida tashkil etilgan sayyor tibbiy ko'rikda terapevt, nevropatolog, ginekolog, okulist, xirurg, stomatolog, endokrinolog va boshqa shifokorlar qabulida bo'lgan fuqarolar chuqur tekshiruvdan o'tkazildi. Muolajaga muhtojlarga dori-darmonlar bepul tarqatildi.

– Sir emas, qon bosimi va yurak-qon tomir, qandli diabet hamda onkologik xastaliklarga chalinayotganlaroz emas, – deydi 54-oilaviy poliklinika bosh shifokori Dilfuza Abdurahimova. – Shu bois har bir inson aslida o'z ixtiyori bilan bir yilda ikki bor ko'rikdan o'tishi lozim. Ammo ko'pchilik xastalikka chalinib bo'lganidan keyingina shifokorni izlab qoladi. Kasallikni davolagandan ko'ra, oldini olgan yaxshi deya sayyor tibbiy ko'rik o'tkazganimiz barchaga ma`qul bo'ldi.

E`tiborlisi, sayyor tibbiy ko'rikka kelganlar uchun laboratoriya xizmati tashkil etildi.

– Aholi EKG va UTT hamda flyurografiya tekshiruvi tufayli ko'p narsani bilib oldi, — deya qo'shimcha qildi tuman markaziy shifoxonasi bosh shifokori Muqaddas Umarova. — Chunki shu tekshiruvlardan so'ng qanchadan-qancha xastaliklar oldindan aniqlandi va endilikda ular aniq tashxis asosida davolanadi.

Darhaqiqat, erta tongdan kechga qadar davom etgan ko'rikka kelganlarga shu yerning o'zida tibbiy yordam ko'rsatilgani, muhtojlarga tibbiy preparatlar inom etilgani mahalla ahlini mamnun etdi.

Akbar YO'LDOShEV

Boshqa xabarlar