Shavkat Mirziyoev ishonch yorliqlarini qabul qildi

131

O'zbekiston Respublikasi Prezidenti Shavkat Mirziyoev 31 may kuni Gruziya, Amerika Qo'shma Shtatlari va Koreya Respublikasining mamlakatimizdagi Favqulodda va muxtor elchilari etib tayinlangan Zurab Abdushelishvili, Deniel Rozenblyum va Kan Chje Kvondan ishonch yorliqlarini qabul qildi.

Davlatimiz rahbari elchilarni mamlakatimizdagi diplomatik missiyasini boshlagani bilan samimiy tabriklab, ularga ushbu sharafli va mas`uliyatli vazifada muvaffaqiyatlar tiladi.
Keyingi yillarda mamlakatimiz xorijiy sheriklar bilan o'zaro manfaatli hamkorlikni kengaytirishga qaratilgan faol tashqi siyosat olib borayotgani alohida ta`kidlandi.
Markaziy Osiyo va MDH davlatlari, Amerika, Yevroosiyo va Afrikaning yetakchi mamlakatlari bilan munosabatlar mustahkamlanib, amaliy hamkorlik tobora faollashayotgani bundan dalolat beradi.
Bundan tashqari, «yo'l xaritalari» asosida nufuzli xalqaro tashkilotlar va mintaqaviy tuzilmalar bilan uzoq muddatli sheriklik aloqalari kengaymoqda.
Prezidentimiz o'z nutqida yangi elchilar vakillik qilayotgan davlatlar bilan ko'p qirrali hamkorlikning istiqbollariga to'xtalib o'tdi.
O'zbekiston bilan Gruziya o'rtasidagi, avvalo siyosiy, savdo-iqtisodiy va madaniy-gumanitar sohalardagi munosabatlar rivojlanib borayotgani mamnuniyat bilan qayd etildi. Keyingi yillarda parlamentlararo aloqalar ham faollashdi.
Gruziya bilan tovar ayirboshlashni ko'paytirish, sanoat, transport, logistika va turizm sohalarida kooperasiyani kuchaytirishga qaratilgan aniq loyihalarni ilgari surish muhimligi ta`kidlandi.
Davlatimiz rahbari O'zbekiston Respublikasi va Amerika Qo'shma Shtatlarining do'stlik va ko'p qirrali hamkorlik ruhidagi ikki tomonlama munosabatlarida yuksak darajaga erishilganini mamnuniyat bilan qayd etdi.
O'tgan yil may oyida AQShga amalga oshirilgan oliy darajadagi tarixiy tashrif mamlakatlarimiz strategik sheriklik aloqalarida yangi bosqichni boshlab berdi.
Bugun barcha darajalardagi muloqot va almashinuvlar faollashgani kuzatilmoqda. AQSh savdo vaziri Uilbur Ross, kongressmenlar Trent Kelli va Visente Gonsales, Missisipi shtati gubernatori Filipp Brayant va boshqalar boshchiligidagi yuqori darajadagi delegasiyalarning mamlakatimizga tashriflari samarali bo'ldi.
Amerikaning yetakchi kompaniya va banklari bilan o'zaro manfaatli hamkorlik kengaymoqda, madaniy-gumanitar aloqalar ­mustahkamlanmoqda, fuqarolik jamiyatini rivojlantirish va inson huquqlarini ta`minlash sohasida, shuningdek, xalqaro va mintaqaviy ahamiyatga molik dolzarb masalalar bo'yicha kons­truktiv muloqot amalga oshirilmoqda.
Davlatimiz rahbari Koreya Respublikasi bilan munosabatlar alohida strategik sherik­lik pog'onasiga ko'tarilganini chuqur mamnuniyat bilan qayd etdi.
Janubiy Koreya Prezidenti Mun Chje Inning o'tgan oyda O'zbekistonga davlat tashrifi ikki tomonlama munosabatlarni yanada yuksak bosqichga olib chiqib, ularni yangi amaliy mazmun bilan boyitdi.
Mamlakatimiz Koreya Respublikasi rahbariyatining Koreya yarimorolida tinchlik va barqarorlikni mustahkamlash borasidagi izchil siyosatini qat`iy qo'llab-quvvatlayotgani ta`kidlandi.
Erishilgan kelishuvlarni amalga oshirish, innovasiya va investisiyalar, transport va kommunikasiyalar, infratuzilmani modernizasiya qilish, ta`lim, sog'liqni saqlash, madaniyat va boshqa yo'nalishlarda qo'shma dastur va loyihalarni o'z vaqtida tayyorlash va sifatli ro'yobga chiqarish masalalariga alohida e`tibor qaratildi.
Prezidentimiz yangi tayinlangan elchilar faol diplomatik faoliyati bilan mamlakatlarimiz o'rtasidagi do'stona munosabatlar, sheriklik va ko'p qirrali hamkorlikni yanada mustahkamlashga munosib hissa qo'shishlariga ishonch bildirdi.
O'z navbatida, Favqulodda va muxtor elchilar davlatimiz rahbariga samimiy qabul uchun yana bir bor minnatdorlik bildirib, mamlakatlarimiz va xalqlarimiz farovonligi yo'lida samarali davlatlararo munosabatlarni izchil rivojlantirishga bor kuch-g'ayratini safarbar qilishini qayd etdi.

O'zA

Boshqa xabarlar