UChUVChILAR VOHADA TAYYoRLANADI…MI?

32

Qariyb ikki yildan buyon ochilishi kutilayotgan Oliy harbiy aviasiya bilim yurti ish boshladi. Xo'sh, unda qanday mutaxassislar tayyorlanadi? Sharoitlari, moddiy-texnika bazasi talabga javob beradimi? “Qashqadaryo” gazetasida bu haqda so'z boradi.

Maqolani to'liq quyida o'qing!

QARShIDA OLIY HARBIY AVIASIYa BILIM YuRTI OChILDI

Qarshi shahrida yangidan barpo etilgan oliy harbiy ta`lim muassasasi – O'zbekiston Respublikasi oliy harbiy aviasiya bilim yurtining ochilishi hamda kursantlarning harbiy qasamyod qabul qilishiga bag'ishlangan tantanali marosim bo'lib o'tdi.

Unda O'zbekiston Respublikasi Prezidenti huzuridagi xavfsizlik kengashi kotibi Viktor Mahmudov, O'zbekiston Respublikasi Mudofaa vaziri, general-mayor Bahodir Qurbonov, viloyat hokimi Zafar Ro'ziev, Janubi-g'arbiy maxsus harbiy okrug qo'mondonligi hamda keng jamoatchilik vakillari ishtirok etdi.

Ma`lumki, Prezidentimiz Shavkat Mirziyoev 2018 yilning 28-30 yanvar kunlari viloyatimizga tashrifi chog'ida Qarshi tumanidagi Xonobod harbiy aerodromida ham bo'lib, harbiy uchuvchilar tayyorlash, ularning amaliy mashg'ulotlar olib borishida ob`ektning imkoniyatlaridan samarali foydalanish maqsadida 1994 yilda asos solingan Jizzax oliy harbiy aviasiya bilim yurtini Qarshi shahrida qayta tashkil etish taklifini bergandi. 

Shundan so'ng Qarshi serjantlar tayyorlash maktabi negizida oliy harbiy aviasiya bilim yurti tashkil etilishi belgilanib, bu yerda keng ko'lamdagi qurilish – bunyodkorlik ishlari amalga oshirildi. Ajratilgan 73 milliard so'm evaziga o'quv korpusi va yordamchi binolar zamonaviy ko'rinishga keltirilib, eng so'nggi rusumdagi trenajyorlar, o'quv-uslubiy qo'llanmalar, axborot-kommunikasiya texnologiyalari bilan jihozlandi. Bir so'z bilan aytganda, maskanda yuksak mahoratli mutaxassislar tayyorlanishi  uchun barcha shart-sharoitlar muhayyo.

– Muassasa havo hujumlaridan mudofaa qo'shinlari va harbiy havo kuchlari uchun 7 ta yo'nalish bo'yicha mutaxassislar tayyorlaydi, – deydi Havo hujumidan mudofaa va harbiy havo kuchlari qo'shinlari qo'mondoni, general-mayor Ahmad Burhonov. – Oliy harbiy aviasiya bilim yurtining aynan Qarshi shahrida tashkil etilishi avvalo kursantlarga mamlakatimizdagi eng yirik harbiy aerodromlardan biri – Xonobod aerodromida harbiy havo kemalarini boshqarish, ularga texnik xizmat ko'rsatish bo'yicha mashg'ulotlar olib borish, bevosita o'quv poligonlarida ishtirok etish  imkonini beradi.  Bu esa harbiy uchuvchilarning professionallik darajasini oshirish, aviasiya hamkorligidagi dala-o'quv mashg'ulotlarini real vaziyatlarga yaqinlashtirgan holda olib borish va uning imkoniyatlaridan unumli foydalanish uchun muhim.

Tadbirda so'zga chiqqanlar tajribali harbiy uchuvchilar tayyorlanadigan mana shu muassasaning   mustaqilligimizning 28 yilligi shodiyonalari davom etayotgan bir paytda ochilayotgani ham o'ziga xos ramziy ma`no kasb etishini ta`kidladi. Zero, istiqlolimiz abadiyligi, yurtimiz tinchligi, osmonimiz musaffoligi ko'p jihatdan bu yerda ta`lim oladigan, yetuk mutaxassis bo'lib, sarhadlarimizni munosib himoya etadigan askar va ofiserlarning mas`uliyatli xizmatlari bilan chambarchas bog'liq.

Tadbir davomida bilim yurti bo'ylab ekskursiya uyushtirildi. Harbiy havo kuchlari tomonidan tayyorlangan havo paradi va aviashou namoyish etildi. Parad avvalida N-125 rusumli vertolyotda davlatimiz bayrog'i olib o'tildi. Mi-8MT, Mi-24 vertolyotlari, S-295, Su-25, Mig-29 samolyotlarining bilim yurti uzra parvozi mehmonlar tomonidan olqishlandi.

Bilim yurti rahbariyatiga Prezident sovg'asi “Isuzu” avtobusi va “Gentra” avtomobili topshirildi.

Shu kuni oliy harbiy ta`lim muassasasi ilk kursantlari harbiy qasamyod qabul qilishdi.

Jahongir BOYMURODOV

2019 yil 6 sentyabr, 72-son

“Qashqadaryo” gazetasi

Boshqa xabarlar