“Forbes” журнали энди Ўзбекистонда ҳам нашр этилади

21

Таниқли қозоғистонлик ишбилармон, “Forbes Kazakhstan” ва “Forbes Georgia” ношири Арманжан Байтасов “Forbes Uzbekistan” журналини чоп этиш ҳуқуқини қўлга киритгани ҳақида маълум қилди.

“Forbes Kazakhstan” журналига берган интервьюсида журналнинг биринчи сонини келгуси йилнинг март ойида чоп этиш режалаштирилганини маълум қилди. Ишбилармоннинг сўзларига кўра, Ўзбекистонда нашрнинг очилиши жуда долзарб, чунки мамлакат бугунги кунда бизнес юритиш нуқтаи назаридан жуда истиқболли ҳисобланади.

«Ҳозирда қўшни мамлакатда содир бўлаётган ўзгаришлар, Ўзбекистон раҳбариятининг дунё бизнесига бераётган ваъдалари катта қизиқиш уйғотмоқда. Тадбиркорлар мамлакатнинг очилиши ҳамда сўнгги ойлардаги каби жадал ривожланишига эътибор қаратмоқдалар», — деди Арманжан Байтасов.

Нашр таҳририяти Тошкентда жойлашади. Ўқувчилар учун сайт ва журнал фаолияти йўлга қўйилади. Босма нашр ҳозирча рус тилида чоп этилади, сайт эса рус ва ўзбек тилларида фаолият кўрсатади.

Арманжан Байтасов Ўзбекистонда “Forbes Club” ишбилармонлик майдончаси ҳам очилишини қўшимча қилди.

Бошқа хабарлар