Кам бўлса-да, бировнинг ҳаққи

1,735

Самарқанд шаҳридаги 11-мактабнинг собиқ тарих ўқитувчиси Жасур Муҳаммадиевга тегишли 100 минг сўм маошнинг ундирилиши арзимас воқеадек кўринса-да, бу ишнинг осонликча кўчмагани ҳайратланарли

Ўша пайтлар Самарқанд шаҳридаги 11-умумтаълим мактабида тарих фани ўқитувчиси ўрни бўш эди. 2016 йил 5 сентябрда мактаб директори Ф.Ғаффоров СамДУда иккинчи мутахассислик ­бўйича таҳсил олаётган Ж.Муҳаммадиевни шу ўринга ишга қабул қилди. Аммо кейинги йилнинг март ойида ўқиш ва иш вақти бир-бирига мос келмаётгани сабабли иш берувчи уни ўқитувчиликдан четлаштирди. Талаба Самарқанд вилоят касаба уюшма ташкилотлари бирлашмаси кенгашига меҳнат ҳуқуқларини ҳимоя қилиш, мажбурий бекор юрган даври учун иш ҳақларини ундириб беришни сўраб мурожаат қилди. Эътиборлиси, аввал унинг шу мазмундаги шикоят аризаларини вилоят Адлия бошқармаси, Бандлик бош бошқармаси, Самарқанд шаҳар прокуратураси ҳам кўриб чиққан эди. Барча текширувларда иш берувчи томонидан ходимни ишга қабул қилиш ва бўшатиш ­жараёнида Меҳнат кодексининг 82, 100, 101, 102, 107, 108-моддалари талаблари бузилган деб топилган. Иш берувчига қоидабузарлик ҳолатларини бартараф этиш тўғрисида тушунтиришлар берилган. Аммо…
Масалан, Ж.Муҳаммадиевни ишга қабул қилиш тўғрисидаги буйруқ Меҳнат кодексининг 82-моддаси 4-қисми талабларига зид равишда расмийлаштирилган бўлиб, буйруқ билан меҳнат шартномаси мазмуни бир-бирига мос келмайди. Ходим ишдан бўшатилгани тўғрисидаги буйруқ билан таништирилмаган.
Ҳужжатларда Ж.Муҳаммадиевнинг яшаш жойи нотўғри қайд этилгани боис, иш берувчи ходим ишдан бўшатилгани тўғрисидаги буйруқнинг нусхаси ва меҳнат дафтарчасини олиб кетиш тўғрисидаги хатни бошқа манзилга жўнатиб юборган, натижада Ж.Муҳаммадиев ишдан бўшаганидан хабарсиз қолиб кетган.
Хуллас, бу ишни юқорида кўрсатилган идоралар ҳал эта олмагач, масала судда кўриб чиқилди. Меҳнат қонунларини бузган мактаб раҳбари тегишли тарзда маъмурий ҳамда интизомий жазога тортилди. Ҳисоб-китобларга кўра, аризачига декабр ойи учун тўланмасдан қолган 100 минг сўм ундирилди.
Бир кулгинг, бир йиғлагинг келади. Ж.Муҳаммадиев бу «юз»ни ундириш учун нечта «юз»ни йўлкира, овқатланиш, қоғоз-қалам ва ҳоказоларга сарфлаб юборди экан? Унинг қанча вақти турли идоралар эшиги олдида сарғайиб ўтди? Аммо у ҳақ эди. Ўз ҳаққини талаб қилаётганди. Мактаб раҳбарияти-чи? ­Югур-югурлар, текширувчиларни кутиб олишу кузатиш, уларга тушунтиришлар бериш учун қанча асаб толалари тўкилди экан? Давлат идораларида ишлаётган ходимларнинг ­бошқа муҳимроқ ишларга сарфланиши мумкин бўлган вақти-чи?
Қизиғи, буларнинг бари раҳбарнинг қонунларни яхши билмаслиги ёки билса ҳам қайсарлик қилиши оқибатида юзага келди. Ўйлаб қоласан киши, мактабдаги машмаша таълим-тарбия жараёнига салбий таъсир ўтказмаганлигига ким кафолат беради?

Улуғбек ҒАНИЕВ,
Самарқанд вилоят касаба уюшма ташкилотлари бирлашмаси
юридик бўлими мудири

Бошқа хабарлар