«ГАИ» ходимига қўл кўтарган ҳайдовчига нисбатан жиноят иши қўзғатилди

854

2021 йил 27 май куни соат 01:30 ларда Самарқанд шаҳрининг Туркистон кўчасида хизмат олиб бораётган ЙПХ инспектори “Matiz” русумли автомашинани тўхтатиб, ҳайдовчи Д.С. дан тегишли ҳужжатларини тақдим қилишни сўраганида, ҳайдовчи ҳужжатларни тақдим қилмаслигини айтиб, унга нисбатан қўпол муносабатда бўлган.

Ҳайдовчининг оғзидан спиртли ичимликни ҳиди келиб турганлиги сабабли уни нарколог кўригидан ўтказиш таклиф қилинганида ҳайдовчи автомашинадан тушиб, тўсатдан ЙПХ инспекторининг юзига уриб тан жароҳати етказган. Бу ҳақда Самарқанд вилояти ИИБ ахборот хизмати хабар берди.

Ҳодиса содир бўлган жой ИИВ ЎХБ Самарқанд вилояти бўйича бўлими ходимлари иштирокида, Самарқанд шаҳар прокуратураси томонидан кўздан кечирилиб, ҳужжатлаштирилган.

Ҳолат юзасидан Д.С.га нисбатан Ўзбекистон Республикаси ЖКнинг 140-моддаси 3-қисми “а” банди ва 219-моддаси 2-қисми билан гумон қилинувчи тариқасида иштирок этишга жалб қилиниб, процессуал тартибда ушланган.