Унинг таъкидлашича, мамлакатдаги ижтимоий шериклик, давлат, иш берувчи ва ходимлар ўртасидаги фаол ҳамкорлик янги ютуқлар пойдеворига айланмоқда.

“Ижтимоий шериклик ва иш жойларидаги ҳамкорлик орқали катта натижаларга эришиляпти. Ўзбекистон адолатли меҳнат тизимига ўтишда глобал акселератор ташаббусининг етакчи иштирокчисига айланмоқда. Бу БМТнинг Барқарор ривожланиш мақсадларини амалга оширишда уч томонлама ҳамкорлик қанчалик самарали бўлиши мумкинлигини яққол кўрсатмоқда”, деди у.

ХКУК раҳбарининг таъкидлашича, бугунги глобал жараёнлар инсоният учун ҳал қилувчи аҳамият касб этади. Қатарда бўлиб ўтадиган Иккинчи жаҳон ижтимоий ривожланиш саммити арафасида Ўзбекистон тажрибаси бошқа давлатлар учун ҳам илғор намуна сифатида кўрилмоқда.

“Ҳозирги замонда тенгсизликнинг ортиши, геосиёсий кескинликнинг кучайиши ва тинчликни таъминлаб келган кўп томонлама тизимдаги инқироз — барчамиз учун жиддий огоҳлик сигнали. Шу билан бирга, иқлим ўзгариши ва рақамли трансформация бутун дунё иқтисодиётини ва жамиятларни тубдан ўзгартирмоқда”, деди у.

Гононинг ушбу сўзлари Ўзбекистондаги ислоҳотлар нафақат миллий даражада, балки халқаро меҳнат стандартларини шакллантираётган глобал жараёнлар контекстида ҳам аҳамият касб этаётганини кўрсатмоқда.