Сурхондарёда Ўзбекистон халқ шоири Усмон Азим таваллудининг 75 йиллиги кенг нишонланди.

Термиз шаҳридаги “Санъат саройи” мажмуасида бўлиб ўтган маданий-маърифий тадбирда халқ шоири Усмон Азим, Сурхондарё вилояти ҳокими Улуғбек Қосимов, Ўзбекистон Ёзувчилар уюшмаси раиси, халқ шоири Сирожиддин Саййид, вилоят ижодкорлари, ёшлар ва жамоатчилик вакиллари иштирок этди.

Тадбирда вилоят раҳбари ардоқли шоирни Сурхондарё аҳли номидан самимий табриклаб, унинг асарларида юртимиз гўзаллиги, халқимиз руҳи ва миллий қадриятларимиз чуқур ифода этилганини таъкидлади. Шунингдек, шоир ижодида инсонпарварлик, Ватанга муҳаббат ва инсон шаънини улуғлаш ғоялари муҳим ўрин тутиши қайд этилди.

Маълумот учун, Президент Шавкат Мирзиёев Усмон Аъзимнинг адабиёт ва миллий маънавият ривожига қўшган улкан ҳиссасини инобатга олиб, унга уч хонали уй совға қилди.

Тадбир давомида ёзувчи ва ижодкорлар, ёшлар ҳамда жамоатчилик вакиллари шоир асарларидан намуналар ўқишди. Шунингдек, Усмон Азимнинг ҳаёти ва ижодига бағишланган видеолавҳалар намойиш этилди.

Айни вақтда вилоятнинг барча ҳудудларида ҳам халқ шоири Усмон Азим таваллудининг 75 йиллиги муносабати билан адабий-маънавий учрашувлар ва ижодий кечалар ўтказилмоқда.