Рустам ака аввал катта корхонада ҳайдовчи бўлиб ишлаган. Бир неча бор тиббий кўрикда қон босими юқори чиққанидан сўнг ишини тўхтатишга мажбур бўлган. Шифокор тавсияси билан ҳовлисида қуён боқишни бошлаган.

– Аввалига ишонмагандим, – дейди у. – Иккита қуён билан бошладим. Ўзим парвариш қилдим. Вақт ўтиб, улар кўпайди. Қуёнлар билан машғул бўлиш саломатлигимга ижобий таъсир қилди. Бугун қон босимим меъёрда.

Қисқа вақт ичида қуёнлар сони 300 тадан ошган. Уларни сотиш орқали даромад олишни йўлга қўйган. Ҳисоб-китобларга кўра, шу давр мобайнида қуёнчилик ортидан қарийб 50 миллион сўм даромад олган.

– Ҳар бир хонадон бу ишни қила олади, – дейди Рустам Бобомуродов. – Катта сармоя шарт эмас. Бироз эътибор ва меҳнат керак, холос.

У шу билан бирга кўчатчиликни ҳам ривожлантирган. Дастлаб бодом уруғидан кўчат етиштиришни бошлаган, кейин мевали дарахтларни пайванд қилиб сотишни йўлга қўйган. Қаровсиз ерларни обод қилиб, минглаб ниҳоллар экиб парваришламоқда.

Ҳозирда бир мавсумда ўн минглаб кўчат сотиб, камида 45 миллион сўм даромад олмоқда. Умумий йиллик даромади эса қарийб 200 миллион сўмни ташкил этаётир.

Баҳодир Ҳалимов,
ishonch.uz