Murojaatni o'rganish jarayonida quyidagilar aniqlandi: O'zbekiston Respublikasi Prezidentining 2022 yil 17 maydagi tegishli Farmoniga asosan 2022 yil 16 iyul kuni Sog'liqni saqlash vazirining buyrug'i qabul qilingan. Unda vazirlik tizimidagi barcha turdagi byudjet muassasalari xodimlarining mehnatiga haq to'lash tarif razryadlarini tasdiqlash belgilangan.

Alisher Usmonov o'zi faoliyat ko'rsatayotgan tibbiyot muassasasiga 2013 yilda «Texnika xavfsizligi bo'yicha muhandis» lavozimiga ishga qabul qilingan. Ammo 2022 yildan joriy etilgan mehnatga haq to'lash borasidagi yangilik unga tatbiq etilmagan. Bu esa vaqt o'tib xodimning noroziligiga sabab bo'lgan.

O'tkazilgan hisob-kitoblar natijasida A.Usmonovga 2022 yil uchun 3 978 080 so'm, 2023 yil uchun 8 900 232 so'm, 2024 yil uchun 11 078 084 so'm, 2025 yilning sentyabr oyiga qadar 7 341 503 so'm va jami 31 298 339 so'm to'lab berilishi zarurligi aniqlandi.

Shundan so'ng, Sog'liqni saqlash xodimlari kasaba uyushmasi respublika Kengashining Sirdaryo viloyati bo'yicha mehnat huquq inspektori tomonidan Sirdaryo tumani sog'liqni saqlash bo'limi boshlig'i nomiga 2025 yil 28 oktyabr' kuni ko'rsatma xati yuborildi.

Ko'p o'tmay, ish beruvchidan javob xati keldi. Unda xodim A. Usmonovga shu yil 7 noyabr' kuni 31 297 900 so'm pul to'lab berilgani va kelgusida xodimga ish haqini oshirilgan holda to'lash tartibi yo'lga qo'yilgani ma'lum qilingan.

Abdurahim ALBEKOv,
Sog'liqni saqlash xodimlari
kasaba uyushmasi respublika Kengashining
Sirdaryo viloyati bo'yicha mehnat huquq inspektori