12 noyabrdan O'zbekistonda bank kartalari bo'yicha uchta muhim yangilik kuchga kirdi, deb yozmoqda jurnalist Behzod Bozorov.

Bu o'zgarishlar nafaqat texnik tartib, balki moliyaviy madaniyat, jamiyatdagi raqamli faollik va to'lov infratuzilmasining rivoji uchun ham ahamiyatli hisoblanadi.

Biznes va ijtimoiy kartalar: segmentatsiyaning boshlanishi

Yangi o'zgarishlarga ko'ra, bank kartalari birinchi marta maqsadga ko'ra turlarga ajratilmoqda:

Biznes karta yakka tartibdagi tadbirkorlar yoki o'zini o'zi band qilgan fuqarolarga mo'ljallangan bo'lib, kichik tadbirkorlar aylanmasini to'g'ri yuritish, shaxsiy va biznes mablag'larini aralashtirmaslik imkonini beradi.

Ijtimoiy karta nafaqa, ijtimoiy to'lovlar, davlat yordamlari uchun. Bu davlat to'lovlari uchun “alohida hisob” kontseptsiyasini joriy qiladi va mablag'lar sarfining shaffofligini oshiradi.

Oldindan emissiya va raqamli identifikatsiya

Kartada familiya-ism majburiy bo'lmaydi. Karta oldindan chiqariladi, keyin esa foydalanuvchi identifikatsiyadan o'tgach faollashtiriladi. Natijada bank filialiga borishga ehtiyoj qolmaydi, kartalar tezkor tarqatiladi, onlayn xizmatlarga o'tish tezlashadi, bank kartalari bozorida raqobat oshadi.

Asosiy yangilik: 14–18 yoshlilarga karta ochishga ruxsat berilmoqda

Bu o'zgarishning ahamiyati katta. Shunki o'spirinlik insonda moliyaviy odatlar shakllanadigan davr hisoblanadi. Kartadan foydalanish yoshlarga to'lov qilish, byudjet tuzish, onlayn xizmatlardan foydalanish hamda moliyaviy intizomni barvaqt o'rganish imkonini beradi.

Bunday tizim qator davlatlar, xususan, Janubiy Koreya, Singapur, Turkiyada keng qo'llanadi.