Гап шундаки, бу инсон шаҳарда ўз шахсий музейини ташкил қилган. Унда узоқ йиллардан бери йиғилган ва кўз қорачиғидек асралган асори- атиқалар, турли ашёлардан иборат 400 дан зиёд экспонат жойланган. Пенсияси ва даромадининг катта қисмини музейни кенгайтириш ва бойитишга сарфлаб келаётган Райимберди Расулбердиев асли қурувчи. Тарихга муҳаббат, қадимий ашёларни йиғишга бўлган қизиқиш яхшигина музей барпо бўлишига туртки бўлди.

- Бу ашёларни битталаб, қишлоқма-қишлоқ юриб йиққанман. Келажак учун ўтмишнинг аҳамияти катта, - дейди у. - Фарзандларимиз бугунги фаровон ҳаёт ўз-ўзидан бўлиб қолмаганини билиши керак.

“Эътибор” деб номланган бу музейдан ер ҳайдаш учун омочга тақиладиган ускунадан тортиб, қадимий урф-одатларни ёдга солувчи турли уй-рўзғор буюмлари, каштачилик намуналари, қизиқарли ашёларгача бор. Бу даргоҳда чин маънода ўтмиш, тарих билан бир лаҳза юзма-юз келасиз. Томоша қилиш учун келаётганлар турли ёш, турли касбдаги кишилар. Айниқса, мактаб ўқувчиларининг бу ерда тез-тез бўлишаётгани аҳамиятлидир.

Музейга қизиқувчиларни унинг манзили қизиқтиради, албатта. Гап шундаки, экспонатлар ҳозирги кунда шаҳарда аукционга қўйилган бинолардан бирига вақтинча жойлаштирилган. Унинг бир жойда муқим бўлиши учун шаҳар ҳокимлиги, маънавият ва музейларга масъулларнинг эътибори, қўллови керак.

Баҳор Холбекова, “ISHONCH”