Беруний таваллудининг минг йиллиги муносабати билан тайёрланган ягона медальон Ўзбекистон тарихи музейига топширилди
Россиянинг Свердловск вилоятидаги Ўзбек миллий маданият маркази раҳбари Обид Туратов пойтахтимиздаги Ўзбекистон тарихи давлат музейига ўзига хос совға билан ташриф буюрди.
«Ватандошлар» жамоат фонди ташаббуси билан ташкил этилган тадбирда у Абу Райҳон Беруний таваллудининг минг йиллиги муносабати билан тайёрланган ноёб медальонни музейга топширди.
Гап шундаки, ушбу медальон 1973 йилда собиқ иттифоқда ҳайкалтарош Юрий Халдеев томонидан Беруний таваллудининг минг йиллигига бағишлаб ягона нусхада ясалган. Айни вақтда у ноёб экспонат ҳисобланади.
– Ўтган йилнинг 4 сентябрь куни Екатеринбург шаҳрида миллатлараро кутубхона ташаббуси билан Беруний бобомизнинг 1050 йиллик юбилейи кенг нишонланди, – деди Обид Туратов. – Тадбирда Бош консуллик, турли миллат вакиллари, олимлар, тарихчилар, жамоатчилик вакиллари иштирок этди. Ўшанда грек миллий маданият маркази раҳбари Даниель Иванович бизга қимматбаҳо металлдан ясалган бир медальон совға қилди. Бугун бу ноёб тарихий ёдгорликни ўз Ватанимга, унинг тарих музейига топширишдан ғоят мамнунман. Биз буюк аждодларимиз билан фахрланамиз, улар қолдирган меросни асраб-авайлашга ҳамиша интиламиз.
– 2022-2023 йиллари буюк мутафаккир ва қомусий олим Абу Райҳон Беруний таваллудининг 1050 йиллиги ЮНЕСКО шафелигида халқаро миқёсда кенг нишонланди, – дейди фалсафа фанлари доктори, профессор Бахтиёр Каримов. – 2 йил давомида 10 дан зиёд давлатларда халқаро конференциялар бўлиб ўтди, тўпламлар нашр қилинди. Бундай катта эътиборни, албатта, буюк бобомизнинг жаҳон цивилизациясига қўшган улкан ҳиссаси билан изоҳлаш мумкин.
Медальон музейнинг «Биринчи Ренессанс даври» бурчагига қўйилди. Бу экспонат тарихнинг бир парчаси сифатида музейда узоқ йиллар сақланажак.
Гулрухбегим Одашбоева,
ishonch.uz
Mақолага баҳо беринг
0/50
0
0
0
0