Яхши кунларда тинчлик-осойишталик, шукроналик куйи бўлган – карнай-сурнай садолари эшитилади. Бугун эса, доимгидан фарқли ўлароқ, 6 та қардош мамлакатнинг гўзал миллий санъатини акс этган куй-қўшиқлари янграмоқда. Ўзбекистон касаба уюшмалари ҳаракатининг 120 йиллиги ҳамда 30 июл “Халқлар дўстлиги” куни муносабати билан ўтказилаётган “Дўстлик” фестивалининг бадиий қисми бўлиб ўтмоқда.

Фестивал давомида халқлар ўз бой маданияти, тарихи ва миллийлигини акс эттирувчи тақдимотлари билан томошабинларни ҳайратда қолдирмоқда. Ҳар бир мамлакат ўзига хос чиқишларни намойиш этиб, санъат ва маданият орқали бир-бирига яқинлашмоқда.

Қардош халқларни тил, маданият, дин ва тарих бирлаштириб туради. Ушбу бирдамлик эса "Дўстлик" фестивалида янада мустаҳкамланмоқда. Фестивал доирасида иштирок этаётган давлатлар Ватан мадҳини куйлар экан, ўз байроғи билан бирга Ўзбекистон байроғини ҳам баланд кўтариши чинакам дўстликни ва чексиз ҳурматни ҳис қилдиради.

Фестивалнинг энг сенсацион нуқтаси – Қирғиз халқи достон айтувчиларининг Ўзбекистон ислоҳотлари ҳамда Ўзбекистон касаба уюшмалари фаолияти, дўстлиги ҳақида айтилган гўзал шеърий достони барча тингловчиларни хушнуд этди.

Фестивалнинг бадиий дастури кўтаринки руҳда бўлиб ўтмоқда.

Диёра Равшанова,
Ishonch.uz