Женнифер Лопес — нафақат қўшиқчи ва актриса, балки йирик бизнесмен, шу билан бирга, глобал бренд сифатида танилган шахс. У турли қийинчиликлар орқали саҳна, бизнес, инсонпарварлик каби соҳаларда катта муваффақиятларга эришиб, ўз номини жаҳон саҳнасига ёзиб қўйди. Лекин қандай қилиб Нью-Йоркнинг оддий бир лотин кварталида ўсган қизалоқ бутун дунё шоу-бизнеси, мода ва косметика саноатидаги энг йирик номлардан бирига айланди? Қуйида шу ҳақда қисқача маълумот берамиз:

Болалиги ва ёшлиги

56 ёшли Женнифер Лопес 1969 йил 24 июлда Нью-Йорк шаҳрининг Бронкс туманида туғилган. Унинг ота-онаси — Дэвид ва Гваделупе Лопеслар — Пуэрто-Рикодан бўлишган. Шу сабабли Женнифер лотин америкаликларга хос ташқи кўринишга эга. Женнифер беш ёшиданоқ рақс ва мусиқага қизиққан. Ота-онаси унинг ҳуқуқшунос бўлишини истаган бўлса-да, лекин у актриса бўлишни орзу қилган. Мактабни тугатиш арафасида “Менинг кичик қизалоғим” фильмида роль ижро этган. Женнифер юридик факультетда фақат бир семестр ўқиб, ўқишни ташлаб кетади. Бу қарор эса ота-онасини қаттиқ ранжитади. Бу қарор оилада катта жанжалга сабаб бўлгач, у уйдан чиқиб кетган. Ўша пайтларда у кундузи юридик компанияда ишлаб, кечалари клубларда раққоса сифатида чиқиш қилган. Лекин у Голливуд орзусидан ҳеч қачон воз кечмаган.

Актрисалик фаолиятидаги бурилиш

Раққосалик фаолияти орқали у кастингларда иштирок этиб, баъзи фильмларда роль ижро этган. 1993 йилда у илк драматик ролини “Потерянный в глуши” фильмида ўйнади. 1995 йилда “Менинг оилам” фильми орқали танила бошлади. Аммо унга ҳақиқий машҳурлик 1997 йилдаги “Селена” фильмидаги ролидан сўнг келди. Ушбу роль орқали у “Олтин глобус” мукофотига номзод бўлди. 1998 йилда у Жорж Клуни билан “Кўринмас” фильмида рол ўйнади ва бунинг учун 1 миллион доллар гонорар олди. Бу уни энг кўп ҳақ тўланган лотин америкалик актрисалардан бирига айлантирди. Кейинчалик “Анаконда”, “Клетка”, “Мовий соялар” ва бошқа фильмларда ҳам намоён бўлди.

Мусиқий юлдуз сифатидаги парвоз

1999 йилда у “If You Had My Love” номли илк қўшиғини тақдим этди ва бу қўшиқ дунёдаги машҳур хит қўшиққа айланди. Шу йилги “On the 6” альбоми ҳам омадли чиқди. 2001 йилдаги “J.Lo” альбоми эса унинг юлдуз сифатидаги мақомини мустаҳкамлади. 2007 йилда испан тилидаги “Como Ama una Mujer” альбоми АҚШ ва Лотин Америкасида чартлардан жой олди. 2014 йилда у Бразилиядаги Жаҳон чемпионати учун “We are one” гимнини ижро этди.

Хайрия ва ижтимоий фаоллиги

Женнифер Лопес “Lopez Family Foundation” орқали аёллар ва болалар соғлиғини қўллаб-қувватлайди. 2017 йилда Пуэрто-Рикода юз берган мусибатлар даврида “One Voice: Somos Live!” концертини ташкил қилиб, 1 миллион долларлик хайрия қилган.

“Бизнес аёл” сифатида

Лопес нафақат ижодкор, балки дунё миқёсидаги йирик бизнесвумен ҳамдир. Унинг “Glow by JLo” атири дунёдаги энг муваффақиятли парфюмериялардан бири ҳисобланади. Унинг “J.Lo by Jennifer Lopez” бренди кийим ва аксессуарлар ишлаб чиқаради ва бутун дунёда машҳур. Шунингдек, унинг “JLo Beauty” косметика линияси ва Delola спритцлари ҳам катта тижорий муваффақиятга эришди. Унинг брендлари умумий ҳисобда $2 миллиарддан зиёд даромад келтирган.

Молиявий ва ижтимоий қудрати

2025 йилдаги маълумотларга кўра, Лопеснинг шахсий бойлиги тахминан 400 миллион долларни ташкил этади. Унинг концертлари, телевидениедаги чиқишлари ва реклама келишувлари глобал таъсир доирасини кўрсатиб туради.

Мукофотлари ва эътирофлари

“Селена” фильми учун “Олтин глобус” номинацияси (1998)

“Анаконда” ва “Клетка” фильмлари учун “Сатурн” мукофотлари

“ALMA Awards” (1998–2002)

“American Music Awards” (2003, 2007, 2011)

“Grammy” номинациялари (2000, 2001)

MTV мукофотлари

Голливуд юлдузлар аллеясида юлдуз (2013)

“Forbes” ва “People” нашрлари томонидан 2012 йилда “Энг гўзал ва таъсирли аёл” деб тан олинган.

Мафтуна Каримова тайёрлади