Касаба уюшмаси бор ташкилот билан йўғи орасида жуда катта фарқ бор. Масалан, қайсики ташкилотда касаба уюшмаси ташкил этилган бўлса, жамоа шартномасига асосан ходимлар мунтазам моддий ва маънавий қўллаб-қувватланади. Ташкилотда муҳим сана ва байрамлар муносабати билан чиройли тадбирлар ташкил этилади. Ходимларнинг ишга бўлган қизиқиши мунтазам ошириб борилади.

Бугун бўлиб ўтаётган Ўзбекистон авиация ходимлари касаба уюшмасининг IX ҳисобот Қурултойида қатнашаётган Урганч халқаро аэропортининг Касаба уюшмаси раиси Алишер Абдуллаев ҳам яқинлашиб келаётган муҳим саналар муносабати билан ходимлар учун қандай янгиликлар ҳозирлаётгани ҳақида гапириб берди.

— Бизнинг Урганч халқаро аэропортимизда 500 нафар ишчи- ходим меҳнат қилади, — дейди А. Абдуллаев.
— Ташкилотимизда ўртача ойлик маош 8 миллионни ташкил этмоқда. Аъзолик бадали бир фоиз. 2025 йилда 41 нафар ишчи-ходимлар Тошкент вилоятидаги дам олиш масканига дам олишга юборилди, 17 нафарига соғликларини тиклаш учун санаторийларга йўлланма берилди. Ходимларнинг 81 нафар фарзандлари болалар оромгоҳларида дам олиб қайтди.
Ҳадемай Мустақиллик байрами ва мактабларда янги ўқув йили бошланади. Истиқлолимизнинг 34 йиллик байрами муносабати билан ишчи-ходимларимизга мукофот пуллари ва байрам дастурхони ташкил этишни режалаштираяпмиз. Бу йил мактабга чиқаётган ходимларнинг 50 дан ошиқ фарзандларига эса 15 турдаги ўқув қуроллари совға қилмоқчимиз. Айни кунларда ана шу режаларнинг ташкилий ишлари билан бандмиз.

Зебо Намозова
ishonch.uz