Хўш, ишда сабабсиз бўлмаган ходимни жазолаш мумкинми?

Самарқандда Ўзбекистон касаба уюшмалари Федерациясининг “Сайёр қабули”да Федерация раиси ўринбосари, меҳнат инспекцияси бошлиғи Қобилжон Қирғизалиев, юридик бўлими мудири Ҳамидулла Примқулов ҳамда мурожаатлар билан ишлаш бўлими мудири Гузалья Ризаева ана шундай кўплаб саволларга жавоб беришди.

Гарчанд Меҳнат қонунчилигида “Прогул” жазо чоралари қўлланилиши кўзда тутилмаган эрса-да, корхона ёки ташкилотнинг ички меҳнат тартибига “прогул”га оид банд киритилсагина, жазо чорасини қўллаш мумкин экан. Акс ҳолда, ишга узрли сабабларсиз келмаган ходимга жазо чораси қўллаб бўлмаслиги бўйича тушунча берилди. Шунингдек, тадбирда Нуробод туман Санитария-эпидемиологик осойишталик ва жамоат саломатлиги маркази бошланғич касаба уюшма ташкилоти етакчиси Ўлмас Тоғаев кўтарган муаммога ҳам ечим топилди.

Маълум бўлишича, соҳада 14 йил ишлаган ходим салкам 8 йил меҳнат таътилида бўлмаган. У бошқа ишга ўтганида иш берувчи томонидан ўтказиб юборилган таътил йилларига компенсация тўлови тўлаб берилмаган. Бу ҳолатга фуқаролик ишлари бўйича туманлараро суд томонидан муддати ўтиб кетган дея рад жавоби берилган.

Касаба уюшма вакиллари ушбу ҳолатга қонуний баҳо берилмаганлиги иш хақига нисбатан даъвода муддат белгиланмаганлигини қайд этишди.

Мулоқот давомида меҳнат қонунчилигидаги ўзгаришлар, ижтимоий шерикчиликни асослантиришга доир қатор масалалар ечими ҳақида ҳам тушунтиришлар берилди.

Нурилла ШАМСИЕВ,
ishonch.uz