Учрашув давомида сенатор давлат тилининг жамият ҳаётидаги ўрни ва миллий онгимиздаги аҳамияти ҳақида сўзлаб берди. Унинг таъкидлашича, тил нафақат мулоқот воситаси, балки миллатнинг тарихи, маданияти ва руҳини мужассам этган муқаддас қадрият саналади. “Давлат тили – бу миллий ғуруримиз. Тилни асраб-авайлаш, унинг нуфузини ошириш ҳар бир фуқаронинг бурчи. Чунки тил йўқолса, миллатнинг руҳи ҳам йўқолади,” — деди сенатор Эрматов ўз нутқида.

Мулоқот давомида Алишер Навоий, Заҳириддин Муҳаммад Бобур, Абдулла Қодирий, Ҳамза Ҳакимзод Ниёзий ва Фитрат каби буюк алломаларнинг ўзбек тилининг шаклланиши ва ривожига қўшган улкан ҳиссаси ҳақида ҳам сўз борди. Улар ёзган асарлар нафақат адабиёт, балки тил маданияти ва миллий онгнинг асосига айлангани таъкидланди.

Учрашувда ўқувчилар сенаторга қизиқарли саволлар билан мурожаат қилиб, давлат тилининг келажаги ва ёшларнинг унинг нуфузини оширишдаги роли ҳақида фикр алмашдилар. Суҳбатда ёшлар ўзбек тилидаги билимларини фақат дарсда эмас, ҳаётда ҳам фаол қўллаши, ижтимоий тармоқларда тоза ва савияли тилда ёзиш зарурлиги таъкидланди.

Суҳбат якунида Ҳусан Эрматов ҳомийлигида мактаб ўқувчилари ўртасида “Энг яхши иншо” танлови ташкил этилиши эълон қилинди. Танлов ғолиблари учун китоб ва эсдалик совғалар тайёрланиши айтилди.