Ҳар йили шу мавсумда меҳнат таътилига чиқаман – пахта даласидан фотоҳикоя.
Кузни икки хил тоифадаги одамлар кутади. Бири ёмғир остидаги сайр ва сарғиш дарахтларга муҳаббати сабабли бўлса, иккинчи тоифадагилар учун куз пахта даласидан бошланади. Бугунги фотоҳикоямизга ўзбекнинг меҳнаткаш инсонларини қаҳрамон деб топдик.
Навоий вилояти Хатирчи туманидаги дала майдонларининг бирида мавсум қизғин тус олган. Қуёш чиқишидан олдин пахтага отланадиган теримчилар куннинг асосий қисмини эгатлар орасида ўтказади. Этак, сув ва нон - энг керакли ҳамроҳ.
Қишлоқ одамларининг кўпи кузни пахтасиз тасаввур қилолмайди, кимдир буни меҳнат деса, яна кимлар учун завқ. Ҳар даланинг ўз қонуни бор, ҳар теримчининг белгиланган ўз қатори. Иш сифати миқдорга эмас, оқ олтиннинг тозалигига қараб баҳоланади. Жараённинг энг машаққатли нуқтаси – оғир этакларни ўлчаш жойигача етказиш. Чунки, қатнашчиларнинг асосий қисми аёллар ва кексалардан иборат.
Пахта даласи фақатгина даромад манбаи бўлиб қолмай, аёллар учун қизғин суҳбат ва дугоналар давараси ҳамдир. 48 ёшли педагог Латофат опанинг таъкидлашича, ҳар йили шу пайтда 40 йиллик қадрдон синфдошлар йиғилади, улар учун жараён “антистресс” деб аталаркан. Аммо кимнидир қийинчилик ва мажбурият етаклайди.
Дала ҳар хил инсонларни ўз ичига оладиган бағрикенг макон. Чақалоғини ташлаб чиққан келин, ўғлини бу фасл уйлаш ташвишидаги ота, сеп, “контракт” ва совуқ қиш харажатларига тайёргарлик кўраётган она, “бу йил албатта талаба бўламан”, деб қўшимча курс учун пул йиғиш илинжидаги қиз…
Кунни 120-130 кг пахта териш билан якунлайдиган Зуҳра опа Раҳимова 30 йиллик касбий тажрибага эга олий тоифали ҳамшира. Эсини танибдики, кузни пахтасиз ўтказиб юбормайди, ҳар йили шу мавсумда меҳнат таътилига чиқади.
– Болалигимдан буён даладаман, деҳқоннинг қизи бўлганим учунми, томорқа ишлари оғир туйилмайди. 4 нафар фарзандим бор, 2 таси “контракт”да ўқийди. Яқинда қизимни узатамиз. Бу йилги пахта пулим сепга аталган. Ўтган йили 15 кунда 7 млн сўм ишлаган эдим, бу йил қизимни бекаму кўст чиқарай деб қаттиқроқ ҳаракат қиляпман.
Кузни икки хил тоифадаги одамлар кутади…
Эъзоза Умр
Эъзоза Умр
«Ishonch.uz» фотохизматининг махсус фотомухбири томонидан тайёрланган фоторепортажлар тўплами.
Репортаж тафсилотлари:
Бошқа фоторепортажлар
“Меҳрибон” ёстиқ ва қуроқдўзлик ёхуд унутилаётган қадриятлар ҳақида фотоҳикоя
Ўзлик ва қадриятларнинг йўқолиб бориши миллатни емирувчи жараёндир. Ўзбек халқи қирқ кечаю қирқ кундуз тўй қиладиган, ҳашаматсевар халқ экани рост, бироқ асрлар оша яшаб келаётган ва чуқур маъно ташийдиган баъзи урф-одат ҳамда қадриятлар миллат илдизининг янада мустаҳкам бўлишига, ёшларда миллий анъаналарга нисбатан меҳр уйғонишига сабабчи бўлади.
Туркиялик ёшлар Самарқанд жозибасидан ҳайратда
Туркиянинг "Türk Metal" касаба уюшмаси аъзолари фарзандларидан иборат гуруҳ Ўзбекистонга саёҳати давомида Самарқандга ташриф буюрди.
Ғамхўрликнинг янги манзили
Ўзбекистон Республикаси Президенти ҳузуридаги Ижтимоий ҳимоя миллий агентлиги тизимида ҳудудларда фаолият юритаётган «Инсон» ижтимоий хизматлар марказлари бугун фуқароларга энг яқин масканлардан бирига айланган.