Ўзбек рассом-карикатурачиси, жаҳон “Карикатуранинг 100 буюк устаси” рўйхатига кирган ҳамюртимиз, Бешариқлик машҳур карикатурачи рассом, Маҳмуджон Эшонқуловни биласизми? Унинг асарлари Италия, Туркия, Япония, Хитой, Болгария, Бразилия, Руминия, Сербия, Жанубий Корея каби давлатларнинг юмор ва карикатура музейларида сақланишини-чи?

Ishonch.uz бу сафар сизларни ана ўша карикатурачи рассом Маҳмуджон Эшонқулов билан яқиндан таништиради.
Унинг ижоди билан танишар экансиз, жамиятда учрайдиган қуср ва камчиликларни карикатура ва юмор орқали ўқувчига қойилмақом тарзда тушунтириб берганига гувоҳ бўласиз.

Қаҳрамонимиз карикатурачилик хавфли касблардан бири, бошимда кўп калтак синган. Буни орқасидан дакки эшитган пайтлар ҳам бўлган. Лекин чизган расмларим яхшиликка хизмат қилади. Бунинг орқасида ҳеч қандай ёмонлик йўқ, дейди.
Дунё таниган карикатурачи Муҳмуджон Эшонқулов чиндан ҳам ўз ишининг устаси. Республикамиз ва хорижда ўтказилган мингдан зиёд жамоавий карикатура ва юмор кўргазмаларида иштирок этиб, 300 дан ортиқ танловларнинг ғолибига айланган. Қолаверса, Муҳмуджон ака Дунё Карикатурачи Рассомлар Иттифоқи аъзоси ҳамдир.
Ўз асарлари орқали ҳаётимиздаги камчиликлар ва иллатларни фош этиб, глобал экологик муаммоларга ўз муносабатини билдириб, шу орқали барчани сергакликка, муаммоларга бефарқ бўлмасликка ундайди.
Зеро, карикатура ҳам санъатнинг бир туридир. Санъатга ошно бўлган қалбларда эса фақат эзгулик, яхшилик туйғулари илдиз отаверади.
Биз эса Маҳмуджон Эшонқуловга янги марраларни забт этишда муваффақият тилаб қоламиз.

Жамшид ЭРГАШЕВ,
ishonch.uz