“Ватан” журнали ва “Миллатпарвар” китоби тақдимоти ўтказилди
Пойтахтимизда Тадбиркорлар ва ишбилармонлар ҳаракати – Ўзбекистон Либерал-демократик партияси (ЎзЛиДеП) сиёсий кенгаши ижроия қўмитаси томонидан “Бирлашсак – Ватанмиз” мавзуида анжуман ташкил этилди.
Анжуманда Ўзбекистон касаба уюшмалари федерацияси муассислигида янги нашр этилган “Ватан” ижтимоий-сиёсий, илмий-маърифий журнали ҳамда давлат ва жамоат арбоби, сиёсатшунос Қудратилла Рафиқовнинг “Миллатпарвар” китоби тақдимоти ўтказилди.
“Ватан” журнали кенг жамоатчилик орасида яхши кутиб олинди. Журнал саҳифаларида Президентимиз Шавкат Мирзиёев томонидан амалга оширилаётган янгиланиш ва ислоҳотлар, Ватанимиз тарихи акс этган таҳлилий мақолалар, зиёлилар, сиёсатшунос ва ёзувчилар асарлари эълон қилиб борилади.
Бугунги дунё тобора таҳликали тус олмоқда. Ким дўст, ким душманлигини аниқлаш тобора қийинлашиб бораётган даврда яшаяпмиз. Ўзини яқин тутган давлатлар ҳам халқаро майдонда зимдан иш қилаётганини кўриб турибмиз. Замон ҳар қачонгидан ҳам мамлакатимиз ва миллатимизнинг келажаги ва тинчлигини ўйлашга ундамоқда.
Анжуман давомида сўз олганлар ҳам аввало тинчлигимизнинг ўзи катта неъмат эканлигини, Ватанни севиш, уни асраш фақат тил билан эмас амал билан собитқадамлик билан амалга кўчиши лозим дея таъкидлашди.
“Ватан”нинг илк саҳифаси озарбайжон шоири Акиф Бағирнинг “Ўзбек келаётир...” номли тантанавор шеъри билан бошланади. Шунингдек, журналда Ўзбекистон Қаҳрамони ва Ўзбекистон халқ шоирлари Абдулла Орипов ҳамда Эркин Воҳидов шеърларини, Абдурауф Фитратнинг “Юрт қайғуси” сочмаси, тил, миллат, миллий онг тушунчалари кенг ёритилган профессор Қозоқбой Йўлдошевнинг “Бузилмас қўрғон” мақоласини ўқиш мумкин.
Mақолага баҳо беринг
0/50
0
0
0
0