Транспорт вазири Илҳом Маҳкамов Олий Мажлис Қонунчилик палатасининг “Глобал транспорт-логистика тармоқларига Ўзбекистон Республикасининг интеграциясини чуқурлаштириш ва миллий транспорт тизими самарадорлигини кучайтириш бўйича амалга оширилаётган ишлар тўғрисида”ги масала юзасидан парламент сўровига жавобан “Тошкент–Самарқанд” пуллик автомобил йўлини қуриш лойиҳаси ҳусусида айрим маълумотларни ошкор қилди.

Қайд этилишича, бугунги кунда давлат-хусусий шериклик шартлари асосида амалга оширилаётган “Тошкент–Самарқанд” пуллик автомобил йўлини қуриш лойиҳасининг техник-иқтисодий асосини ишлаб чиқиш мақсадида Европа тикланиш ва тараққиёт банки томонидан 1,5 млн. евро миқдорида маблағлар ажратилган.

Мазкур лойиҳа доирасида халқаро стандартларга жавоб берадиган 303 километр узунликдаги автомобил йўли I-а техник тоифали, 6 тасмали “Автомагистрал” талаблари асосида қурилади. Шунингдек, барча туташма ва иншоотлар устидан янги кўприк ва йўл ўтказгичлар қуриш ҳамда интелектуал транспорт тизими (ITS)ни ўрнатиш кўзда тутилган.

Шу билан бирга, консултантлар томонидан лойиҳанинг техник-иқтисодий асос (ТИА) ҳужжатлари жорий йил март ойида ишлаб чиқилиб, белгиланган тартибда 2024 йил 20 март куни Иқтисодиёт ва молия вазирлиги ҳамда Инвестициялар, саноат ва савдо вазирлигига экспертизадан ўтказиш учун киритилган. Ушбу лойиҳа ТИАга тегишли вазирликлар томонидан ижобий хулоса олинганидан сўнг, тендер савдоларига эълон берилади.