Ўзбекистон касаба уюшмалари боғи ташкил этилди
Ҳадисларда, агар ер юзида қиёмат бошланса-ю, қўлингда бир туп кўчат бўлса, уни экиш кераклиги айтилган. Мазкур даъватдан англашиладики, инсон боласи ҳар қандай вазиятда ҳам ободликка интилиши керак.
Айни замонда баъзи бир давлатларда бузғунчилик, хунрезлик авж олмоқда. Минг шукурки, бизнинг замин тинч ва осуда. Ҳар кўнгилда ободлик қайғуси. Айниқса, шу кунларда «Яшил макон» умуммиллий лойиҳаси авж паллага кирди. Фурсатни ғанимат билган борки, ушбу хайрли ишга муносиб ҳисса қўшиш ҳаракатида.
Бугун эрта тонгдан Ўзбекистон касаба уюшмалари Федерацияси раҳбарияти, фаоллари, ишчи-хизматчилари Тошкент вилояти, Нурафшон шаҳри, “Қумариқ” МФЙ ҳудудида ташкил этилган “Ўзбекистон касаба уюшмалари боғи”да жам бўлишди.
– Шу йилнинг 29 март куни ўтказилган видеоселектор йиғилишида давлатимиз раҳбари “Яшил макон” умуммиллий лойиҳаси доирасида 125 миллион туп кўчат экиш бўйича масъул раҳбарларга топшириқ берган эди, – дейди Ўзбекистон касаба уюшмалари Федерацияси раисининг маслаҳатчиси Ҳаётжон Шарипов. – Мазкур вазифадан келиб чиқиб, Федерация раисининг тегишли қарори билан тизимдаги барча ташкилотларда 1 апрелдан 10 май кунига қадар “Долзарб 40 кунлик” эълон қилинди. Белгиланган сана мобайнида тармоқ касаба уюшмаларининг республика кенгашлари, Федерациянинг Қорақалпоғистон, вилоятлар ва Тошкент шаҳар кенгашлари, тасарруфдаги ташкилотлар умумий ҳисобда 300 минг дона кўчат экишади.
Йиғилганлар нуронийларнинг дуои фотиҳаси билан ишга киришдилар. Уюшқоқлик билан ўтказилаётган мазкур тадбирда умумий ҳисобда беш ярим гектар ерга беш ярим минг тупга яқин мевали ва манзарали кўчат экиш режалаштирилган. Шундан 860 тасини дарахтлар кўчати ташкил этади.
– Боғ ҳудуди Ўзбекистон касаба уюшмалари Федерацияси Капитал қурилиш бошқармаси томонидан карталарга ажратиб чиқилди. Сўнг йўл, экиладиган майдонларни кўчатларнинг турлари бўйича тримбл аппаратида мувофиқлаштирдик, – дейди “Kasaba-loyiha” МЧЖ директори Ғайрат Иброҳимов. – Боғда ходимлар хонаси ва бошқа зарур объектлар қурилади. Кўчатларни парваришлаш мақсадида боғбон штатлари очилиб, ходимлар бириктирилади. Марказий йўл томонга манзарали кўчатлар, гуллар қадалади. Бир сўз билан айтганда, “Ўзбекистон касаба уюшмалари боғи” шунчаки кўзбўямачилик ёки урҳо-ур билан номигагина яратилаётгани йўқ. Боғ келажакда катта комплексга айлантирилади. Зотан, бунга ҳозирдан замин ҳозирланяпти.
Mақолага баҳо беринг
0/50
0
0
0
0