Савол: Ишловчи пенсионерлар ҳар йилги меҳнат таътилига чиқадиган бўлса, давомийлиги узайтирилган ёки бошқа турдаги имтиёзи бор бўлган меҳнат таътили олишга талабгор бўлиши мумкинми?

Жавоб: Меҳнат кодексида иш берувчи билан тузилган меҳнат шартномаси асосида меҳнат фаолиятини амалга ошираётган ходимлар учун таътилларнинг қуйидаги турлари назарда тутилган: ҳар йилги меҳнат таътили, ижтимоий таътиллар, иш ҳақи қисман сақланадиган таътил ва иш ҳақи сақланмайдиган таътил.

Ҳар йилги асосий энг кам меҳнат таътилининг давомийлиги йигирма бир календарь кунини ташкил этади. Меҳнат қонунчилигига мувофиқ ходимнинг ёши ва соғлиғининг ҳолати ҳисобга олинган ҳолда ҳар йилги асосий узайтирилган таътил ўн саккиз ёшгача бўлган шахсларга ҳамда I ва II гуруҳ ногиронлиги бўлган ходимларга ўттиз календарь кунидан иборат ҳолда берилади. Булардан ташқари, мазкур кодексда ходимларга қўшимча таътиллар бериш ҳам белгиланган бўлиб, меҳнат шароитлари ноқулай ишларда банд бўлган ёки ноқулай табиий-иқлим шароитларида иш бажараётган ёхуд битта ташкилотда ёки тармоқда кўп йиллик иш стажига эга бўлган ходимлар қўшимча таътил олиш ҳуқуқига эга бўла оладилар.

Юқорида баён этилганлардан кўринадики, ишловчи пенсионерлар учун давомийлиги узайтирилган ёки бошқа турдаги имтиёзли таътиллар қонунчиликда алоҳида белгиланмаган. Лекин, таъкидлаш жоизки, қонунчиликда белгиланганларидан ташқари, ҳар йилги асосий узайтирилган таътиллар бериш, шунингдек, ҳар йилги асосий узайтирилган таътилнинг давомийлигини унинг қонунчилик билан кафолатланган давомийлигига нисбатан кўпайтириш жамоа келишувларида, жамоа шартномасида, ички ҳужжатларда, меҳнат шартномасида назарда тутилиши мумкин.