Янги таҳрирдаги Конституцияда “инсон – жамият – давлат” тамойили, ижтимоий давлат қуриш масаласи мустаҳкамланган, Бош қомусимизда давлатнинг ижтимоий мажбуриятлари уч баробар кўпайтирилган. Бугун Президентимиз ташаббуси билан амалга оширилаётган ислоҳотлар янгиланган Конституциямизда белгиланган “Инсон қадри учун” деган устувор тамойилни тўла рўёбга чиқаришга қаратилган бўлиб, инсон манфаатларини мустаҳкамлаш, ижтимоий ҳимоясини кучайтириш, шу жумладан фуқаролар учун муносиб меҳнат шароитларини яратиш ҳамда меҳнатга доир ҳуқуқларни таъминлашга хизмат қилмоқда.

Халқаро меҳнат ташкилотининг Ўзбекистон томонидан ратификация қилинган конвенсиялари қоидалари ҳамда халқаро стандартлар миллий қонунчилигимизда ўз аксини топмоқда ва амалиётга жорий этилмоқда.

Қўшма йиғилишда фуқароларнинг қонунчиликда белгиланган меҳнатга доир ҳуқуқларини муҳофаза қилиш, соҳага оид қонунчиликнинг амал қилинишини таъминлаш, қулай меҳнат шароитларини яратиш ҳамда меҳнат хавфсизлигини кучайтиришга доир масалалар кўриб чиқилди.

Жойларда ўтказилган учрашувларда билдирилган фикр-мулоҳазалардан келиб чиқиб, олис ҳудудларда ёки алоҳида табиий шароитларга эга бўлган ҳудудларда (вахта усулида) меҳнат қилаётган, шунингдек ноқулай меҳнат шароитларидаги иш билан шуғулланаётган фуқаролар меҳнатини рағбатлантириш устувор вазифалардан бири эканлиги айтиб ўтилди.

Шунингдек, йиғилишда Сув ҳўжалиги вазирлигининг йирик сув насос стансияларида ишлаётган фуқароларнинг қонун ҳужжатларида, шу жумладан Меҳнат кодексида, “Меҳнатни муҳофаза қилиш тўғрисида”ги Қонунда кафолатланган адолатли ва хавфсиз меҳнат шароитларига эга бўлиш, меҳнат муҳофазасини таъминлаш борасида амалга оширилаётган ишлар ҳақидаги ахбороти ҳам эшитилди.

Депутатлар томонидан мураккаб меҳнат шароитларида фаолият юритаётган фуқаролар меҳнатини моддий қўллаб-қувватлаш, иш ҳақи ва устамаларнинг тўланишини таъминлаш ҳамда ижтимоий ҳимоясини янада кучайтириш зарурлиги таъкидланди.