Изоҳда Савдо-саноат палатаси вакили, Алкоголсиз ичимликлар ва шарбат ишлаб чиқарувчилар уюшмаси ижрочи директори Алфия Мусинанинг фикрлари келтирилган. Эслатиб ўтамиз, айнан Алфия Мусина томонидан ушбу муаммо илк бор кўтариб чиқилган эди.

Мусина ўз сўзида “тадбиркорлар учун яхши янгилик” ҳақида маълумот бериб ўтган. “Дўстлар, бугун ажойиб янгилик билан бўлишмоқчиман. Биз кўтарган муаммо блогер ва оммавий ахборот воситалари орқали кенг жамоатчиликка етиб борди. Натижада масала ҳал этилди, беш мингдан ошиқ витринали музлаткичлар учун узоқ кутилган сертификатларни олишга муваффақ бўлинди. Бугун эса барча музлаткичлар тегишли савдо нуқталарига мижозларга хизмат кўрсатиш учун жўнатилди. Лекин бу билан тўхтаб қолиш керакмас. Муаммо тўлиқ ҳал этилди, деб бўлмайди. Техник агентликка сертификатлаш бўйича янги тартиб ишлаб чиқиш таклифини бердик. У халқаро меъёрларни ҳам кўзда тутади. Шунингдек, биз маҳаллий ишлаб чиқарувчиларнинг ҳам имкониятларини ўрганмоқдамиз”, дея таъкидлайди Алфия Мусина.

Техник жиҳатдан тартибга солиш агентлиги эса “масала агентлик томонидан муваффақиятли ҳал этилиб, тадбиркорлар эришилган натижадан мамнун эканликларини билдиришмоқда” дея изоҳ берган.

“Тадбиркорлар давлат идоралари билан конструктив мулоқот ижобий ўзгаришларга олиб келиши ва тадбиркорлик ривожига хизмат қилишини таъкидлайдилар. Шунингдек, ассоциация техник жиҳатдан тартибга солиш тизимини ислоҳ қилиш, хусусан, мувофиқликни декларациялаш амалиётини кенгайтириш ташаббусларини фаол қўллаб-қувватлаётгани алоҳида таъкидланди. Ҳозирги вақтда ушбу механизм жорий этилган ва тадбиркорлар томонидан муваффақиятли қўлланилмоқда, бу эса тадбиркорлик ва назорат қилувчи органларнинг ўзаро ҳамкорлигини янада самарали ва қулай қилишга хизмат қилмоқда. Савдо-саноат палатасида бизнес вакиллари, жумладан Алфия Мусина иштирокида ўтказилган йиғилишда витринали музлатгичларни сертификатлаш масаласи кўтарилди.

Муҳокама чоғида Мусина Ўзбекистон Техник жиҳатдан тартибга солиш агентлиги вакилига ушбу маҳсулотларни сертификатлаштириш тартибига оид савол билан мурожаат қилган. Агентлик барча таклиф ва мулоҳазаларни ўрганган ҳолда тегишли таклифларни ўрганиб чиқади”, дейилади муносабатда.

Эслатиб ўтамиз, мазкур масала илк бор июнь ойида кўтариб чиқарилганди. Савдо-саноат палатасида тармоқ ва ишлаб чиқариш бирлашмалари раҳбарлари билан очиқ мулоқотда музлаткичлар масаласи ўртага ташланган ва Техник жиҳатдан тартибга солиш агентлиги томонидан жорий этилган бюрократия танқид қилинганди. Кейинчалик блогер Отабек Бакиров ҳам масалага эътибор қаратди ва агентликни “тадбиркорларни сарсон қилиш ҳамда зарарга тиқиш”да айблаб чиқди. Нашримиз ҳам мазкур масалага бағишланган мақолада тадбиркорларга енгиллик бериш бўйича ташкилотга мурожаат қилган эди.

Хулоса қилиб айтганда, витринали музлаткичлар бўйича жорий муаммо ижобий ҳал этилган, эндиликда келажакдаги ноқулайликларни бартараф этиш учун тегишли таклифлар ишлаб чиқилмоқда. Албатта, муаммога эътибор қаратилгани ижобий. Агентлик ушбу масаланинг илдизига тушиб, тадбиркорларга ҳеч қандай муаммо қолдирмаса, ўйлаймизки, нур устига аъло нур бўлур эди.

Аброр ЗОҲИДОВ
ishonch.uz