DV-2027 натижаларини рўйхатдан ўтказиш ва эълон қилишнинг бошланиш саналари тез орада эълон қилинади. Ўзгаришлар ташкилий характерга эга бўлиб, дастурнинг ўзига таъсир қилмайди. Ушбу ўзгаришлар DV-2027 учун танланган шахсларнинг виза топшириш муддатига таъсир қилмайди. Бу муддат 2026-йил 1-октябрдан 2027-йил 30-сентябргача ўзгаришсиз қолади.

Diversity Visa дастури ҳар йили АҚШга миграция даражаси паст бўлган мамлакатлар орасида 50 мингга яқин визаларни тақсимлайди. Натижаларни текшириш Entry Status Check (ESC) тизими орқали амалга оширилади.

2025-йилда Ўзбекистон ғолиблар сони бўйича (5,5 минг киши) биринчи ўринни эгаллаган. Кейинги ўринларда Қирғизистон (3 минг), Тожикистон (2,9 минг) ва Қозоғистон (2 минг) бўлган. 16-сентябрдан бошлаб лотереяда иштирок этиш учун 1 доллар тўлаш кераклиги маълум қилинди.

Аввал қандай эди?
Аввал харажатлар фақатгина ғолиб бўлган иштирокчилар томонидан тўланадиган 330 доллар миқдоридаги тўловга киритилган эди. Энди эса, 1 доллар тўлов барча иштирокчиларга татбиқ этилмоқда, бу эса харажатни кўпчилик орасида тенг тақсимлашга хизмат қилади.

Давлат департаменти бу ўзгариш сохта рўйхатдан ўтиш ҳолатларини камайтиришга урғу бермоқда, яъни лотереядан фойда кўришга уринувчи фирибгарлар сони қисқариши кутилмоқда.

Green Card нима?
Green Card чет эл фуқароларига АҚШда расман ишлаш имконини берувчи шахсни тасдиқловчи ҳужжатдир. Бу виза лотереяси бўлиб, унда иштирок этиш учун талабгорлардан махсус аризани тўлдириш талаб этилади. Ҳар йили бутун дунё бўйлаб минглаб аҳоли лотереяни ютиб олади ва АҚШга расман кўчиб ўтиш имконига эга бўлади. Ариза бериш жараёни тахминан октябр ойида бошланса, натижалар май ойларида эълон қилинади. Мувофиқликка эришган шахслар ҳақиқий картани олиш учун ҳам бир неча ой кутишларига тўғри келади.

Green Card лотереяси DV-2027 деб номланади, чунки у лотерея ғолибларига иммиграцион DV визалари бериладиган молиявий йилни (Fiscal Year) кўрсатади. Америкада молия йили 1-октябрда бошланиб, 30-сентябрда тугайди.