Одатда «Касаба уюшмалари бизга нима қилиб беради?» деб норози бўладиган кишига дуч келсам, «Ўзи жамоа шартномасини ўқиб кўрганмисиз?» дейман.

Кейин айрим имтиёзларни санаб бераман. Масалан, соғлиқни сақлаш ходимлари касаба уюшмаси Республика кенгаши ҳамда соғлиқни сақлаш вазирлиги ўртасида тузилган тармоқ келишувида белгиланган кўплаб имтиёзлар меҳнат қонунчилигида йўқлигини айтаман. Хусусан, «Меҳнатни муҳофаза қилиш тўғрисида»ги қонуннинг 33-моддасида ходимнинг соғлиғига етказилган зарар ўрнини қоплаш учун бир йўла бериладиган нафақа тўлови унинг бир йиллик иш ҳақидан кам бўлмаслиги кўрсатилган. Тармоқ келишувида эса бу миқдор икки йиллик иш ҳақидан кам бўлмаслиги белгиланган.

Кенгашимизга мурожаат йўллаган Қабул Отажонов манфаатларини ҳимоя қилиш жараёнида тармоқ келишувида белгиланган имтиёзларни асос сифатида келтирдик. Гап шундаки, Қ.Отажонов 2023 йил июнь ойидан Республика тез тиббий ёрдам марказининг Хоразм вилояти филиалида ҳайдовчи бўлиб ишлаб келган. Ўша йил 17 декабрда филиалнинг махсус бригадаси ходимлари И.Абдуллаев, Б.Саиджанова билан хизмат вазифасини бажариш учун кетаётган вақтида бахтсиз ҳодисага учраган. Оқибатда ҳайдовчи оғир тан жароҳати олгани туфайли 100 кундан ортиқ даволанган. 2024 йил 3 майда тиббий ижтимоий экспертиза комиссияси томонидан II гуруҳ ногирони (40 фоиз меҳнатга лаёқатсиз) даражаси белгиланган. Аммо...

Ўрганишлар давомида вақтинчалик меҳнатга лаёқатсизлик нафақаси 80 фоиздан тўлаб келингани аниқланди. Касаба уюшмасининг саъй-ҳаракати билан нафақа 100 фоиздан қайта ҳисобланиб, ўртадаги фарқ қопланди. Суғурта компаниясидан эса жами 43 миллион 288 минг 851 сўм нафақа пули ундириб берилди.

Бундан ташқари, тармоқ келишувига асосан, ходим фойдасига яна бир йил учун жами 34 миллион 53 минг 490 сўм товон пули ундириш мақсадида тегишли тартибда судга даъво-ариза киритилди ва у қаноатлантирилди.

“Мен касаба уюшмаси шунчалик қудратли, аъзолар манфаатларини ҳимоя қилиш учун охиригача туриб берадиган ташкилот эканлигини билмасдим. Агар асаба уюшма ташкилоти бўлмаса бу пуллар менга берилмаган бўларди, умуман, шундай ҳуқуқларим борлигини билмасдим ҳам”, - дея эътироф қилди Қабул Отажанов соғлиқни сақлаш ходимлари касаба уюшмаси республика кенгаши раисига ёзган миннатдорчилик хатида.

Ҳалилулла ИСАКЖАНОВ,
Ўзбекистон Соғлиқни сақлаш ходимлари касаба уюшмаси
Республика Кенгашининг Хоразм вилояти бўйича меҳнат техник инспектори