Ўтган ҳафтанинг охирида ижтимоий тармоқларда Тошкент шаҳар Сергели туманидаги мактабларнинг бири ҳудудида аёл жинсига мансуб фуқаронинг зўрлаб, сўнг ўлдириб кетилгани ҳақидаги хабарлар тарқалди.

Бош прокуратура матбуот котиби Ҳаёт Шамсутдинов “ishonch.uz”га мазкур ҳолатнинг жорий йил 1 декабрь куни Сергели туманидаги 47-сонли мактаб ҳудудида аниқланганини тасдиқлаб, ўлим сабаблари қотиллик жиноятига алоқадор эмаслигини маълум қилди.

Маълум қилинишича, Сирдарё вилояти Сардоба тумани “Қўрғонтепа” маҳалласида доимий рўйхатда турган, ишсиз, вақтинчалик Тошкент шаҳар ҳудуди кўчаларида яшаб келган 1979 йилда туғилган М.М.нинг ўлими юзасидан ўша куннинг ўзида суд-тиббиёт экспертизаси тайинланган.

Экспертизанинг дастлабки маълумотига кўра, фуқаро М.М.нинг ўлими “сурункали юрак ишемик касаллиги, кардиосклероз, ўткир юрак қон-томир етишмовчилиги, алкаголдан ўткир заҳарланиш, бош юқори ва пастки лаб юмшоқ тўқималарини лат ейишлари, пастки лаб эзилиб йиртилган яраси, юз, тана, қўл ва оёқ соҳалари қонталашмалари ва тери шилинмалари, ички аъзолари тўлақонлиги” натижасида вужудга келган.

Ҳозирда мазкур ҳолат юзасидан туман прокуратураси томонидан терговга қадар текширув ҳаракатлари олиб борилмоқда.