“Қашқадарё вилоятиданмиз. Қизим Тошкентдаги Сингапур институтини тамомлади. Анъанага мувофиқ диплом ҳимоя куни ёнида туришни, ютуғига шерик бўлишни хоҳладик. Сингапур институтининг мажлислар залида мана салкам уч соатдан ошди-ки, свет йўқ. Диплом ҳимоя замонавий ускуналар орқали амалга оширилар экан. Ҳимояга шай турган талабаларнинг ҳафсаласи пир бўлди. Залда 500 нафарга яқин одам тўпланган. Чироқ ўчишига биз вилоятда яшаб кўникиб кетгандирмиз, аммо нуфузли олийгоҳда уч соатдан бери светнинг ёнмаётгани албатта ажабланарли. Қолаверса, диплом топшириш учун Сингапурдан институт таъсисчилари келган. Талабаларнинг айтишича, институтда чироқ ўчиши сўнгги пайтларда одатий ҳолга айланган. Вилоятдан келган аксар ота-оналар тадбир тугашини мўлжал қилиб, поездга чипта харид қилган экан.

Ноилож тадбирни кўра олмай орқага қайтиб кетишди. Биз ҳалиям тадбир бўлишини кутиб ўтирибмиз.

Мурожаат ishonch.uz сайтига 13 ноябр 11:33 да келиб тушди. Дарҳол “Ҳудудий электр тармоқлари” АЖ матбуот котиби Фахриддин Нуралиев билан боғландик. Матбуот котиби қисқа муддат ичида манзил бўйича ўрганиб, қуйидагича жавоб берди:

— Хусусий қурилиш компанияси томонидан ер қазиш ишлари давомида “Сингапур 1” ва “Сингапур 2” ер ости кабелига жиддий шикаст етказилган. Муаммони бартараф этиш учун Чилонзор тумани электр таъминоти корхонаси тезкор бригадаси томонидан таъминот тикланди. Айни пайтда истеъмолчилар қайта тармоққа уланган. Ҳозирда муаммо бартараф этилди.

Бизга мурожаат йўллаган юртдошимиз билан боғландик.

— 20 дақиқа олдин свет ёнмаганлиги учун барча ота-оналар, талабалар ва уларнинг дўстлари залдан чиқариб юборилди. Ташкилотчилар ҳозир қўнғироқ қилиб, орқага қайтинг, свет келди дейишди. Тадбир бошланяпди, аммо эрталабки кайфиятдан асар ҳам йўқ. Кўпчиликнинг ота-онаси кетиб қолди.

Пойтахтда ҳам чироқнинг тез-тез ўчиб тураётгани аллақачон янгилик эмас. Айниқса, бу ҳолат аномал совуқ ёки иссиқ кунларда кўп кузатилади. Бугунги вазиятдан келиб чиқиб қарайдиган бўлсак, аномал совуқ ёки иссиқда эмасмиз. Аммо свет ўчишда давом этмоқда...