Ўзбекистон Соғлиқни сақлаш ходимлари касаба уюшмаси республика Кенгашининг Навоий вилояти бўйича меҳнат хуқуқ инспекторига Хатирчи туман Санитария эпидемиологик осойишталик ва жамоат саломатлиги бўлимидан бир гуруҳ ходимлар мурожаат йўллашган. Унда 4 нафар санитария врачи, 9 нафар санитар врач ёрдамчилари устама тўловларини ундиришда ёрдам сўрашган.

Мурожаат меҳнат қонунчилигига белгиланган тартибда ўрганиб чиқилди. Натижада Вазирлар Маҳкамасининг 276-сонли Қарорида соғлиқ учун хавфли ва меҳнат шароитлари оғир бўлган шароитда ишлаётган ходимларнинг тариф ставкасига 15 фоиз миқдорида қўшимча тўлов белгилангани, аммо ушбу тўловлар мурожаатчиларга 2020 йилдан бери тўланмасдан келинаётгани аниқланди. Мазкур ҳолат бўйича Хатирчи туман Санитария эпидемиологик осойишталик ва жамоат саломатлиги бўлими бошлиғига ёзма кўрсатма киритилди. Аммо иш берувчи кўрсатмадаги талабларни бажармагач, Фуқаролик ишлари бўйича Хатирчи туман судига 13 нафар ходимнинг манфаатини кўзлаб, даъво ариза билан мурожаат қилинди.

Суд томонидан ходимлар фойдасига жами 115 600 000 (бир юз ўн беш миллион олти юз минг) сўм ундириб берилди ва уларнинг ҳақ-ҳуқуқ ҳамда манфаатлари тўлиқ тикланди.

Завриддин Ҳалимов,
Ўзбекистон Соғлиқни сақлаш ходимлари касаба уюшмаси республика Кенгашининг Навоий вилоят бўйича меҳнат хуқуқ инспектори