Bu dolzarb muammoga Kasaba uyushmalari federatsiyasi huquqiy yechim izlamoqda.

Ma'lumki, xorijiy til o'qituvchilari faqat milliy yoki unga tenglashtirilgan xalqaro sertifikatga ega bo'lgan taqdirdagina ta'lim tizimida faoliyat yuritishi mumkinligi haqida qaror qabul qilingan.

Ta'lim va fan xodimlari kasaba uyushmasi respublika Kengashi esa ana shu V2 sertifikatiga ega bo'lmaganligi sababli mehnat shartnomasi bekor qilinishi xavfi ostida qolayotgan 20 mingdan ziyod pedagogning huquqlarini himoya qilmoqda.

O'qituvchilarga 2026 yil 1 yanvariga qadar sertifikat olish uchun qo'shimcha muhlat berilishi ular uchun katta yengillik yaratdi. Biroq muddatning cheklanganligi va imtihon jarayonlari bilan bog'liq ayrim omillar pedagoglar orasida yana xavotir uyg'otmoqda.

Shuningdek, o'quv yilining o'rtasida o'qituvchilar ishdan bo'shatiladigan bo'lsa, o'quvchilar taqdiri nima bo'ladi, degan savol ham jamoatchilikni o'ylantirayotgan edi.

Mazkur masalaga aniq yechim topish maqsadida O'zbekiston ta'lim va fan xodimlari kasaba uyushmasi Respublika kengashi tashabbusi bilan Maktabgacha va maktab ta'limi, Kambag'allikni qisqartirish va bandlik hamda Adliya vazirliklari vakillari ishtirokida muloqot tashkil etildi.

Muhokamalardan so'ng tomonlar qisqa fursat ichida barchani qanoatlantiradigan huquqiy yechim ishlab chiqish bo'yicha kelishuvga erishdi.

Tez orada B2 sertifikati masalasi yuzasidan mutasaddilar tomonidan rasmiy ma'lumot ham e'lon qilinadi.