Dastlab bu g'oya faqat o'zi va yaqinlari uchun tayyorlangan gullar bilan cheklangan edi. Ammo ijtimoiy tarmoqlarda tarqalgan fotosuratlar va guldastalarning badiiy bezaklari keng omma e'tiborini tortdi. Buyurtmalar soni ortib bordi, gullar esa nafaqat xonadonlarni, balki ayollarning hayotini ham bezay boshladi.
— Boshida xavotirda edim: mijoz topamanmi, mahsulotlarim yoqadimi, degan savollar qiynardi. Ammo harakatdan to'xtamasdan, har bir guldastani mehr bilan yasadim. Shu bois bizga ishonganlar soni kundan-kunga ortdi, — deydi Dilorom Tillaeva.
Uyda o'tirgan, farzand tarbiyasi bilan mashg'ul oddiy ayol o'z qo'li bilan orzu qilgan ishni biznesga aylantirdi. Ayni paytda u tayyorlagan gullar nafaqat poytaxt, balki viloyatlar miqyosida ham katta talabga ega.
— Oliy ma'lumotli bo'lishimga qaramasdan, uzoq yillar bolalarim tarbiyasi bilan uyda o'tirganman. Hech qanday maxsus uskuna yoki tsexsiz, uy sharoitida boshlagan bu ishim asta-sekin brendga aylandi. Bugun men yasagan gullar ko'plab xonadonlarni bezab turibdi, — deydi u.

Qahramonimizning ijtimoiy tarmoqdagi sahifasi hozirda yuz minglab kuzatuvchilarga ega. Uning gullari nafaqat go'zallik, balki ilhom va umid ham ulashmoqda. Brend ko'plab ayollarni o'z ustida ishlashga, uydan chiqmasdan turib ham mustaqil daromad topishga undaydi.
— Biznesim rivojlana boshlagandan keyin, mendan bu ishni o'rganishni xohlovchilar ko'paydi. Men esa buni imkoniyat sifatida qabul qildim. Bilim va tajribamni boshqalar bilan bo'lishishga qaror qildim, — deydi u.
Hozirga qadar Dilorom Tillaeva 50 dan ortiq ayolga hunar o'rgatgan. Ular orasida o'z faoliyatini boshlagan va mustaqil daromad topayotganlar talaygina.

Feruza Rahimova,
Quvonch To'raev
ishonch.uz