Яқинда бўлиб ўтган Ўзбекистон касаба уюшмалари Федерацияси Бош Кенгашининг IX Мажлиси ҳам ана шундай ҳисобот руҳида ўтди. Унда тизимда амалга оширилган ишлар, келгусидаги устувор режа ва вазифалар ҳамда йўл қўйилган камчиликлар юзасидан фикр-мулоҳазалар билдирилди.

Таъкидланишича, Жамоа шартномаларига киритилган қўшимча имтиёз ва кафолатлар натижасида 24 мингдан зиёд корхона ва ташкилотларда қарийб 1,1 млн. нафар ходимнинг иш ҳақлари оширилган, 2,5 млн. нафардан зиёд ходим асосий узайтирилган, 3,5 млн. нафардан ортиқ ходим эса йиллик қўшимча таътиллардан фойдаланмоқда. 71 минг 40 ташкилотда жамоа шартномалари асосида ижтимоий таътиллар белгиланган ва улардан фойдаланган ходимлар сони 1млн. 219 минг 233 нафарни ташкил этади.

Иш ҳақидан муддати ўтган қарздорлик бўйича жамоатчилик мониторинги натижаларидан келиб чиқиб суд, прокуратура, ҳокимият органлари, меҳнат инспекциясига киритилган 200 га яқин мурожаатлар натижасида иш ҳақидан муддати ўтган қарздорлик жорий йилнинг 1 ноябрь ҳолатига шу йилнинг 1 январига нисбатан 95 млрд, 275 млн. сўмга камайишига эришилди.