Ўзбек асллари, ўзни билганлар,

Музни ёриб чиққан, тошни тилганлар,

Аждарлар оғзидан омон келганлар,

Футбол ўйнаётир ўзбек боласи.

Етмиш йил ер бўлиб ётганлар айтсин,

Бутифос заҳрини ютганлар айтсин,

Пахта деб кўмирдек қотганлар айтсин,

Футбол ўйнаётир ўзбек боласи.

Қиру адирларда, шан далаларда,

Сурмаранг оқшомлар, тонг паллаларда,

Шаҳарда, қишлоқда, маҳаллаларда,

Футбол ўйнаётир ўзбек боласи.

Бутун эл бир бўлиб ғолиблик кутди,

Меҳрибон онанинг дуоси ўтди,

Ўттиз етти миллион ниятга етди,

Футбол ўйнаётир ўзбек боласи.

Рақибни гангитиб, ўйлатиб қўйиб,

Ўн бирга тўққизни ўйнатиб қўйиб,

Қора қошларини ўйнатиб қўйиб,

Футбол ўйнаётир ўзбек боласи.

Йиқилса ҳам, дарҳол кулиб туради,

Булар бунча қувноқ — кулиб туради,

Чемпион бўлишин билиб туради,

Футбол ўйнаётир ўзбек боласи.

Энди баҳор, ёз, қиш, кузгача футбол,

Бу мўъжиза футбол, ўзгача футбол,

Дунёни лол этди ўзбекча футбол,

Футбол ўйнаётир ўзбек боласи.

Юртбошим табриклаб, олқишлаб турди,

Совғага энг учқур “тулпор”лар берди,

Юрт йўлин ёритди, ўзбек кун кўрди,

Футбол ўйнаётир ўзбек боласи.

Мардлар ортга қайтмас юриш бошлади,

Мана футболда бурулиш бошлади,

Халқимнинг кўзида севинч ёшлари,

Футбол ўйнаётир ўзбек боласи.

Яшил майдонларда бахтиёрларим,

Янги ўзбекларим, бахти борларим,

Эй аҳди ёрларим, шахти ёрларим,

Футбол ўйнаётир ўзбек боласи.

Темир тилсимларин ечди Осиё,

Чемпионга қучоқ очди Осиё,

Бошидан тиллолар сочди Осиё,

Футбол ўйнаётир ўзбек боласи.

Ўзбек қўл узатди, қўл бергин, жаҳон,

Жаҳон кубогига йўл бергин, жаҳон,

Ўзбек йўлга чиқди, йўл бергин, жаҳон,

Футбол ўйнаётир ўзбек боласи.

Зулфия Мўминова