Январь ойида аҳолининг келгуси 12 ойлик инфляцион кутилмалари ўтган ойга нисбатан ўзгаришсиз сақланиб қолиб, 14,4 фоизга тенг бўлди. Бу ҳақда Марказий банк ахборотномасида маълум қилинди.

Ҳисобот даврида келгусида нархларга оширувчи босим кўрсатиши мумкин бўлган асосий омиллар сифатида коммунал хизматлар қимматлашишини қайд этган респондентлар улуши кўпайган бўлса, ёқилғи ва энергия ресурслари қимматлашиши, валюта курси ўзгариши, транспорт харажатларининг ошиши ҳамда нархларнинг сунъий оширилишини таъкидлаган аҳоли респондентлари улуши камайган.

Шунингдек, аҳолининг юқори инфляцион кутилмалари савдо соҳаси вакиллари томонидан билдирилган бўлса, келгусида нархлар шаклланиши бўйича нисбатан паст кутилмалар қишлоқ хўжалиги соҳаси вакиллари томонидан қайд этилди.

Аҳоли инфляцион кутилмаларининг юқори кўрсаткичи Тошкент вилоятида, нисбатан паст инфляцион кутилмалар эса Жиззах вилоятида истиқомат қилаётган аҳоли томонидан қайд этилди.