Бунда ҳудудлар бўйича ўртача ойлик номинал ҳисобланган иш ҳақининг энг юқори кўрсаткичлари Тошкент шаҳрида (9 072,4 минг сўм) ва Навоий (6 766,1 минг сўм), Тошкент (5 097,9 минг сўм), Андижон (4 616,1 минг сўм) ҳамда Бухоро вилоятларида (4 343,9 минг сўм) кузатилган.

Бу борадаги энг юқори ўсиш суръатлари эса Тошкент шаҳрида (121,4 фоиз) ва Самарқанд (117,6 фоиз), Сирдарё (116,7 фоиз), Наманган (116,5 фоиз) ҳамда Фарғона (115,1 фоиз) вилоятларида қайд этилган.

2024 йил январ-декабр ойларида иқтисодий фаолият турлари бўйича ўртача ойлик иш ҳақининг энг баланд кўрсаткичи – банк, суғурта, лизинг, кредит ва воситачилик фаолияти соҳасига тўғри келиб, 15 263,7 минг сўмни ташкил этди. Шунингдек, ахборот ва алоқа соҳаси 13 157,4 минг сўмни, ташиш ва сақлаш соҳаси 8 113,3 минг сўмни ва саноат соҳаси 6 439,9 минг сўмни ташкил этиб, ўртача ойлик иш ҳақига нисбатан юқори кўрсаткични ташкил қилган.

Таълим (3 637,0 минг сўм) ҳамда соғлиқни сақлаш ва ижтимоий хизматлар кўрсатиш (3 411,0 минг сўм) соҳалари эса бошқа соҳаларга нисбатан энг қуйи поғоналарда эканлигини кўриш мумкин.

Иқтисодий фаолият турлари бўйича ўртача ойлик иш ҳақининг 2020-2024 йиллардаги ўзгариш динамикасига қараладиган бўлса, таълим ҳамда соғлиқни сақлаш ва ижтимоий хизматлар кўрсатиш соҳаси ўртача ойлик иш ҳақи кўрсаткичидан анча қуйида шаклланган бўлиб, 2020 йилдаги (ўртача иш ҳақи 2 673,3 минг сўм бўлган) мос равишда 1 980,3 минг сўм ва 1 811,2 минг сўмдан 2024 йилда (ўртача иш ҳақи 5 357,2 минг сўм) мос равишда 3 637,0 минг сўм ҳамда 3 411,0 минг сўмга етган, холос.