Тошкент вилоятидаги “Zhonctzan chemical” МЧЖ қўшма корхонасида ишловчи Ё.Рустамов иш пайтида тан жароҳати олди. Лекин унга даволаниши учун моддий ёрдам уёқда турсин, таътил ҳам берилмади.

Шундан сўнг, Ё.Рустамовга муолажалар қилаётган, унинг турмуш ўртоғи Н.Рустамова Ўзбекистон касаба уюшмалари Федерацияси Тошкент вилояти кенгашига зарар ундирилишини ва даволаниш учун расман таътил берилишини сўраб мурожаат қилди. Кенгашнинг меҳнат-техник ҳамда меҳнат-ҳуқуқ инспекторлари томонидан ҳолат атрофлича ўрганилди. Натижада жабрланувчига фойдаланилмаган меҳнат таътили ҳамда даволаниши учун жами 44 млн. сўм миқдорида маблағ ундириб берилди.

Шунингдек, Бўка туманида жойлашган “Qarshi stroy sentr” МЧЖда ишловчи Н.Худойбердиевнинг ўтган йилнинг ноябр ойи иш ҳақи ҳамда меҳнат таътили учун ҳақ тўланмаганлиги тўғрисидаги мурожаати ҳам ўрганилди. Инспекторларнинг саъй-ҳаракатлари туфайли, корхона томонидан Н.Худойбердиевга жами 12 млн сўм маблағ тўлаб берилди.

Машраб Мирзаев,
Шокир Хазраткулов,
Ўзбекистон касаба уюшмалари Федерацияси
Тошкент вилояти кенгаши инспекторлари