Ўзбекистон 24 йиллик қора рўйхатдан чиқарилди
Мазкур рўйхат АҚШ Савдо вакиллигининг (USTR) 301-махсус ҳисоботи асосида тузилиб, Ўзбекистон ушбу рўйхатга 2000 йилда киритилган эди.
Ўзбекистон интеллектуал мулкнинг ҳуқуқий муҳофазаси ва ҳимояси ҳолати бўйича АҚШ Савдо вакиллигининг (USTR) 301-махсус ҳисоботидаги кузатувдаги давлатлар рўйхатидан (қора рўйхат) чиқарилди.
Адлия вазирлиги хабарига кўра, Ўзбекистон ушбу рўйхатга 2000 йилда киритилган бўлиб, 24 йилдан буён “кузатувдаги давлатлар рўйхати”да қолаётган эди.
Қайд этилишича, муайян давлатнинг “кузатувдаги давлатлар рўйхати”га киритилиши унда интеллектуал мулкни ҳимоя қилиш бўйича жиддий муаммолар мавжуд эканлигини кўрсатади ҳамда бевосита хорижий корхоналар томонидан инвестициявий фаолиятни амалга оширишда алоҳида эътибор қаратилади.
Бугунги кунга қадар Марказий Осиё минтақасидан фақат Ўзбекистон ва Туркманистон “кузатувдаги давлатлар рўйхати”да қолиб келаётган эди.
“Охирги беш йилда интеллектуал мулк объектларини рўйхатдан ўтказиш тартибларини соддалаштириш, улар бўлган ҳуқуқларни самарали ҳимоя қилиш, халқаро шартномаларга аъзо бўлиш ва ташқи алоқаларни ривожлантириш ҳамда ЖСТнинг TRIPS битими талабларини миллий қонунчиликка имплементация қилиш йўналишида амалга оширилган тизимли ишлар натижасида шундай натижага эришдик”, – дейилади Адлия вазирлиги муносабатида.
Долзарб мавзулар
Mақолага баҳо беринг
0/50
0
0
0
0