Бўстонлиқ тумани Тиббиёт бирлашмасида ўриндошлик асосида ишлайдиган 19 нафар ходимга узлуксиз иш стажи учун белгиланган устама ҳисобланмаганлик ҳолати аниқланди. Ўзбекистон Соғлиқни сақлаш ходимлари касаба уюшмаси Республика Кенгашининг Тошкент вилояти бўйича меҳнат техник инспекторлари томонидан ўтказилган ўрганиш асосида ҳолатга ойдинлик киритилди.

Аниқланишича, Тиббиёт бирлашмаси томонидан меҳнатга ҳақ тўлашнинг қонунийлиги, иш ҳақи ва бошқа тўловлар, рағбатлантиришлар қонунчилик талаблари асосида олиб борилмаган. Яъни ўриндошлик асосида (ички,ташқи) ишлаётган ходимларга узлуксиз иш стажи учун устама ҳақ тўланмаётганлиги маълум бўлди.

Ваҳоланки, Вазирлар Махкамасининг “Тиббиёт ходимлари меҳнатига ҳақ тўлашнинг такомиллаштирилган тизимини тасдиқлаш тўғрисида"ги қарорига мувофиқ, алоҳида муассасалар, бўлинмалар ва лавозимларда узлуксиз иш стажи учун устамалар; шошилинч тиббий ёрдам хизматининг врачларига, ўрта ва кичик тиббиёт ходимларига; узлуксиз ишланган биринчи уч йил учун ҳамда ҳар бир кейинги икки йил учун тариф ставкасига нисбатан 10 фоиздан миқдорда белгиланади, устаманинг энг кўп миқдори — 30 фоиз; ойлик иш ҳақига (окладига) нисбатан қўшимча тўланиши лозимлиги белгиланган.

Шундан сўнг, камчиликларни тезда бартараф қилиш юзасидан иш берувчига кўрсатма хати киритилди. Бироқ, иш берувчи томонидан ундаги мажбурият бажарилмади. Иш судга оширилди. Бўлиб ўтган судда жами 19 нафар ходимларга тўланмай қолган устама ундирилиши ҳақида қарор чиқарилди.

Муҳаммаджон Рўзметов,
Соғлиқни сақлаш ходимлари касаба уюшмаси
республика Кенгашининг Тошкент вилояти бўйича меҳнат ҳуқуқ инспектори.