Жорий йилнинг ўтган етти ойи мобайнида биргина Самарқанд вилоятида 192 та коррупция ва мансабини суистеъмол қилиш ҳолатлари аниқланган. Турли вазифаларда хизмат қилган 257 нафар шахс жиноий жавобгарликка тортилган. Улар томонидан давлат манфаатларига 110 миллиард сўм зарар етказилганлиги аниқланди.
Жиноятлар хронологиясига назар солганда мактабгача ва мактаб таълими, соғлиқни сақлаш ва ҳокимлик тизимида бюджет маблағларини талон-тарож қилинишининг турли кўринишларига дуч келиш мумкин. Оддий бир мисол. 2020 йилдан ҳозиргача ушбу тизимнинг туман бўлималарида ишлаган ўнлаб мансабдорлар жиноий жазога тортилган бир шароитда соҳада ўнгланиш ясалмаяпди. Биргина 2023 йилда Қўшработ туман мактабгача ва мактаб таълими бўлимини бир йил атрофида бошқарган шахс бир неча миллиард сўм бюджет маблағларини ўзлаштиргани аёнлашди. Бу ҳол кучайса кучайдики, аммо камайганича йўқ. Айни йилда жазога тортилган раҳбар ва мансабдорларнинг 156 нафари мол-мулкни талон-тарож қилиш, 23 нафари фирибгарлик, 14 нафари мансаб ваколатини суиистеъмол қилиш, 13 нафари пора бериш ва олиш, 51 нафари эса коррупциявий жиноятларни содир этган.
-Коррупцияга қарши курашда муросасиз муносабатни қарор топтиришда нафақат масъул идоралар балки ҳар бир кишининг фуқаролик масъулиятини ҳис қилиши муҳим аҳамият касб этади,-дейди Ўзбекистон касаба уюшмалари Федерацияси Самарқанд вилоят кенгаши юрист консульти Толиб Эшмонов.-Мансабдор ёхуд масъул шахсларнинг таъмагирлик, ўз манфаати йўлида суиистеъмолчиликларга йўл қўяётганилигига гувоҳ бўлган киши ўз вақтида бонг уриши, тегишли идораларга хабар бериши лозим. Бундай қонунбузарлик ҳақида ахборот берган шахсларнинг қонун ҳимоясида бўлиши кафолатланган. Барчамиз бир ёқадан бош чиқариб бу иллатга қарши оёққа қалқишимиз зарур.

Нурилла Шамсиев,
Ishonch.uz