9 апрель - Буюк саркарда, йирик давлат арбоби, Соҳибқирон Амир Темур таваллуд топган кун
1336 йилда Қашқадарёнинг Хўжаилғор қишлоғида таваллуд топган Амир Темур Самарқанднинг дунё сайқалига айланишида улкан ҳисса қўшган.
Соҳибқирон бу ерда бир-биридан гўзал, бетакрор обидалар – жоме масжиди, Кўксарой, Бўстонсарой, Шоҳи Зинда каби мақбараларни бунёд этди.
Самарқандликлар дам олиб, ҳордиқ чиқаришлари учун шаҳар ичи ва атрофида баҳаво, хушманзара 12 боғ-саройни яратди.
Чингизхон бошчилигидаги мўғуллар Самарқандни вайрон қилган эди, оқибатда шаҳарни қайта тиклашнинг иложи бўлмади. 1370 йилда Амир Темур Самарқандни ўз давлатининг пойтахти қилиб танлаб, қадимги Самарқанд – Афросиёбни қайта тиклашдан кўра, янги шаҳарни бунёд этишни маъқул топди. Шу тариқа Амир Темур Самарқандни янги шаҳар сифатида қайта барпо қилди.
Амир Темур 1405 йил 18 февраль куни Ўтрор шаҳрида вафот этган.
