«Камолон» ош марказини таништирмоқчи бўлдим. Жуда қиммат жойга олиб бормадим, бугунги кунда хижолат бўлмайдиган даража, деб шу жойни танладим. Дастурхонга 3-4 та салат, чой, компот, 6 кишига 6 товоқ ош (тўрттаси Самарқандча зиғир ош), нон вам айда-чуйда қўйдик. Маза қилиб ейишди, қолдиришмади, хурсанд бўлдим.

Бизнинг оилада бир ўйин бор: биргалашиб овқат есак, тўлов қанча эканлигини топиш ўйнаймиз. Бу сафар ҳам шу ўйинни ўйнадик. Бири «Ўзбекистонни биламан, арзон сизларда, менимча 60 долларча бўлади» деди. Янгиси «Камида 100 доллар, яхши жойда 6 киши ўтирдик, бир кишига 15-16 доллар бўлиши керак» деган фикрни билдирди.

Ҳали ўзим кўрмаган эдим, улар ҳам, ҳатто ўзим ҳам ҳайрон бўлдик: 470 минг сўм! 6 кишига, 39 доллар, маза қилиб ейдиган! Ўйлаб қолдим, 2023 йилда Парижда бир тушлик қилгандим. Аталага ўхшаган бир коса нимарса, сичқонинг думидек бир сих шашлик, озгина булочка, бир тақсимча салат, бир чашка чой. Дод десанг азийди! Битта оддий тушлик 35 евро!! Бу 40 доллар дегани!!! «Бу Европа, ойликлар ҳам шунча ярашада», дейсизми. Билдим, таҳлил қилдим. Мен битта оддий журналистман, 1000 доллар ойлик оламан (жаа ваҳима деманг, ўртача 12 млн сўм).

Борганимда ҳамкасбларнинг маошларига қизиқдим. Албатта, бу этикага тўғри келмайди. Лекин барибир солиштирилади-да. Журналистларнинг ўртача ойлиги 3-4 минг евро экан. Уларнинг аксарияти ойлиги билан эмин-эркин яшай олмаскан. Ҳамма тушлигини кўтариб юраркан, ижаралари 1,5 минг еврогача экан. Битта мисол орқали кўринадики, мен ойлигимга 200 порция тушлик қила оламан, ҳамкасбларим ўртача 100 порция ея олади.

Илтимос, дарров «бўлмаган гап, шуям солиштириш бўладими, Ўзбекистон қайда-ю Европа қайда?» дея ёқамга ёпишманг. Мен ўз фикримни айтяпман. Европада биз ҳавас қилган бадавлатлар ҳам, амаллаб яшаётганлар ҳам, кўчаларда қолиб кетганлар ҳам бисёр. Хулоса эса ўзингиздан.

Биламан, бундан ҳам арзон жойлар бор, кўп. Табиийки бундан қимматлари ҳам бор. Лекин меҳмонлар олдида хижолат бўлмайдиган меҳмондорчилик бўлди, деб ҳисоблайман.

Яна бир гап: Бирор марта омма «арзончилик бўлиб кетди» деганини эслай олмайман, лекин қимматчиликдан нолиганлар кўпчилик. Иттифоқ даврида кўрганим навбат, бўм-бўш пештахта, тақчиллик. СССР тарқаган пайтларку, буткул қаҳатчиликка айланиб кетди. Майли, тарих бўйича минг марталаб баҳслашиш мумкин…

Аброр Зоҳидов, Ishonch.uz