Бугун инсон коинотга биринчи парвозни амалга оширган кун
Ўтган асрнинг 1961 йил 12 апрелида Юрий Гагарин “Восток-1” космик кемасида "Бойқўнғир" космодромидан фазога учирилди ва дунёда биринчи марта Ер сайёраси атрофида орбитал парвозни амалга оширди.
Парвоз Ерга яқин фазода 108 дақиқа давом этди. Бу вақт ичида кема Ер атрофида бир марта айланиш қилди, шундан сўнг Гагарин Саратов вилоятидаги Смеловка қишлоғи ҳудудига "Восток" аппаратида муваффақиятли қўнди. Икки кундан кейин мамлакат ва бутун дунё биринчи космонавтни шарафлади.
Юрий Гагарин коинотга парвоз қилганидан кейин Совет Иттифоқи Қаҳрамони унвонига сазовор бўлди. Бу унвон унга Ватан учун жасорат кўрсатгани учун берилган.
Шундан буён 12 апрель – Космонавтика куни сифатида, БМТ Бош ассамблеясининг 2011 йил 7 апрелдаги резолюцияси билан эса "Жаҳон авиацияси ва космонавтикаси куни" сифатида нишонланади.
Дунёнинг биринчи фазогири ҳаётидаги тутган ўрни ҳам тарихий аҳамиятга эга. Республикамизнинг Мирзачўл тумани маркази 1974 йилдан буён Гагарин номи билан аталади. Ўша йили туман марказига шаҳар мақоми берилиб, Гагарин номи билан аталиб бошланган. Бу шаҳарда биринчи космонавтга ўрнатилган ҳайкал Марказий Осиё республикаларидаги энг маҳобатлиси ҳисобланади.
Юрий Гагарин Ўзбекистонга тез-тез меҳмонга келиб турганлигини бугун катта авлод вакиллари яхши эслайди. У 1961 йилдан 1968 йилгача республикамизга олти марта келган. Юртимизга сафари давомида кўплаб жамоат, маданият ва санъат арбоблари, ёшлар, оддий одамлар орасида бўлиб, кўплаб дўстлар орттирган.
2019 йил Жаҳон авиацияси ва космонавтикаси кунида космонавтлар – Владимир Жонибеков, Солижон Шарипов, Юрий Онуфриенко ва Россия давлат думаси депутатларидан иборат делегация аъзолари Юрий Алексеевич Гагарин ҳайкалини зиёрат қилиш учун келган эди.
Долзарб мавзулар
Mақолага баҳо беринг
0/50
0
0
0
0