Жомбойлик Шоҳиста Қобиловани тақдир мана шундай синов билан «сийлади». Туйқус ўзини бошқаролмай, ерга қулади. Аранг кўзини очганида тепасида яқинлари қўл қовуштириб ўтирганини кўрди. «Менга нима бўлди», – дея сўрашга забони айланмади унинг. Салкам бир ой аросатда ётганини кейинчалик билди. Қўққисдан юрак хуружига учраган аёлнинг ҳаётини сақлаб қолиш учун шифокорлар чинакам матонат кўрсатишган эди. Бироқ барибир у тўшакка «михланди».

– Ногиронликни белгилаш ва битта аравача сўраб, кириб-чиқмаган эшигимиз қолмади ҳисоби, – дейди Ш.Қобилова. – Начора, сафдан чиққач, бировга керагинг бўлмай қоларкансан...

Шундай кунларнинг бирида унинг жияни Касаба уюшмалари Федерацияси қошида хотин-қизлар муаммолари бўйича куну тун фаолият юритаётган 1211 рақамли «Ишонч телефони»га сим қоқиб, қариндошига ёрдам сўради. Шундан сўнг қарийб етти ой ўз дарди билан ўзи курашган аёлнинг масаласи назоратга олинди.

– Касаба уюшмалари аралашуви билан ТИЕК комиссияси хулосаси асосида менга I гуруҳ ногиронлиги белгиланди, – дейди Шоҳиста Қобилова. – Мустақил ҳаракат қилолмайман. Шу боис битта аравача бўлса, унда-бунда очиқ ҳавода сайр қилиб, дардимни унутардим. Менга хабар берилишича, бу илтимосим ҳам тез орада ижобий ҳал этиларкан. Касаба уюшмаларига ташаккур!

Нурилла ШАМСИЕВ,

Ishonch.uz