Анжуман 2024/2026 йиллар макроиқтисодий кўрсаткичлар прогнози ҳамда 2024 йил учун давлат бюджети лойиҳаси муҳокамасига бағишланди. Унда мутасаддилар бошқа ОАВ қатори Ishonch.uz'га ҳам кутилаётган бир қатор ўзгаришларни маълум қилди.

Жумладан, Иқтисодиёт ва молия вазири ўринбосари Аҳадбек Ҳайдаров солиқ тизимида кутилаётган қуйидаги ўзгаришларни санаб ўтди:

– 2024 йил 1 январдан спиртга акциз солиғи икки баробарга, яъни 1 литри учун 7,4 минг сўмдан 14,9 минг сўмгача оширилади.

– 2024 йил 1 апрелдан бошлаб юк кўтариш қуввати 10 тоннадан ортиқ машиналар учун йиллик базавий ҳисоблаш миқдорининг 5 баравари миқдорида пул йиғими жорий этиш таклиф этилмоқда.

–Шунингдек, келгуси йилнинг 1 апрелидан бошлаб таркибида шакар мавжуд бўлган газланган ичимликларнинг 1 литри учун 500 сўм миқдорида акциз солиғи жорий этилиши мумкин.

Газ ва свет нархлари ошиши эҳтимоли юқори

"Газ, электр энергияси нархларини ўзгартириш бўйича масала кун тартибида турибди. Муҳокамаларга қарамай ҳали якуний қарорга келинмади" – деди Иқтисодиёт ва молия вазири биринчи ўринбосари Илҳом Норқулов анжуманда. "Бу соҳани субсидиялаш босқичма-босқич камайтирилиши кўзда тутилган" –дея унга қўшимча қилди Иқтисодиёт ва молия вазири ўринбосари Аҳадбек Ҳайдаров.

Давлат бюджети ва инфляция

2024 йилда консолидациялашган бюджет даромадлари прогнози 375,0 трлн сўм, харажатлари прогнози 427,5 трлн сўм миқдорида, консолидациялашган бюджет – умумий фискал баланси ялпи ички маҳсулотга нисбатан 4,0 фоиз миқдорида тақчиллик билан режалаштирилмоқда. 2024 йилда бюджет тақчиллигининг юқори чегараси 4 фоиз этиб белгиланиши сабабли инвестиция лойиҳаларини молиялаштириш учун жалб қилинадиган ташқи қарз миқдори сақланиб қолиниб, тақчилликни қоплаш учун жалб қилинадиган қисмини оширган ҳолда жалб қилинадиган ташқи қарзнинг чекланган ҳажмини 5,0 млрд АҚШ доллари миқдорида, шундан 2,5 млрд АҚШ доллари Давлат бюджетини қўллаб-қувватлаш, шу жумладан, бюджет тақчиллигини молиялаштиришга, қолган қисми инвестиция лойиҳаларини молиялаштиришга йўналтириш белгиланмоқда.

Қайд қилинишича, йил якунига кўра инфляция даражаси пасайиши кутилмоқда

Халқаро валюта жамғармасининг прогнозларига кўра, дунё бўйлаб инфляция даражаси 2022 йилги ўртача 8,7 фоиздан 2023 йилда 6,9 фоизгача ва 2024 йилда 5,8 фоизгача тушиши, бироқ пандемиядан олдинги даврдан (2017 – 2019 йиллардаги 3,5 фоиз) юқори даражада бўлиши тахмин қилиняпти. Ўзбекистонда инфляция даражаси 2022 йилдаги 12,3 фоиздан 2023 йилда 9,0 фоиз атрофигача тушиши кутилмоқда.

Шунингдек, анжуманда электромобиллар ишлаб чиқаришни йўлга қўйишнинг аниқ муддати ҳам маълум қилинди.
Унга кўра, 2024 йил бюджет параметрларига кўра, машинасозлик соҳасида 2024 йилнинг II ярмида янги “BYD Uzbekistan Factory” МЧЖ ҚКни ишга туширилиши орқали электромобиллар ишлаб чиқаришни йўлга қўйиш кўзда тутилган. Бундан ташқари электротехника саноатида қиймати 6,3 млн АҚШ долларлик 2 та мавжуд қувватларни модернизация, техник ва технологик қайта жихозлаш лойиҳаси ва 10 та умумий қиймати 39,7 млн АҚШ долларлик янги ишлаб чиқариш қувватларини ишга туширилиши мўлжалланган.