Баргларни ёқиб, ҳавони заҳарлаш нафақат экологик жиҳатдан, қонуний томондан ҳам чўнтакка зиён келтиради. Чунки Маъмурий жавобгарлик тўғрисидаги кодекснинг 88-моддасига кўра, атмосфера ҳавосини муҳофаза қилиш талабларига риоя этмаслик базавий ҳисоблаш миқдорининг уч бараваридан беш бараваригача, мансабдор шахсларга эса — беш бараваридан ўн бараваригача миқдорда жарима солишга сабаб бўлади.

Экофаол Мўтабар Хушвақтованинг таъкидлашича, баргларни ёқиш эмас, уларни тўплаб ерга кўмиш ёки шунчаки тўкилган ерида қолдириш фойдалидир. Бу уларнинг табиий равишда чиришига ва ерга тайёр ўғит бўлиб сингишига хизмат қилади. Дунёнинг кўплаб ривожланган шаҳарларида ҳам барглар ёқилмайди, шунчаки ерда қолдирилади ёки махсус техникалар орқали тўпланиб, компост қилиш учун олиб кетилади. Бу каби оддий ва кўп меҳнат талаб қилмайдиган ишлар орқали биз табиатга кўмаклашишимиз жуда муҳим.

Бундан ташқари, дарахт ва гуллар экиш нафақат савобли, балки табиатни рағбатлантирувчи ва ҳавони тозалашга хизмат қиладиган энг самарали ишдир.

Шакира Жўраева,
ЎзЖОКУ талабаси